Xefe Suku Parlamentu, Postu Administrativu Lautem, Munisípiu Lautem, Ângelo Calvão Silva/ Imajen Tatoli,IP.

LAUTEM, 09 dezembru 2019 (TATOLI) – Bailoro naruk iha tinan ne’e, halo bee menus no duut-maran hodi afeta karau 20 mate iha Suku Parlamentu, Postu Administrativu Lautem, Munisípiu Lautem.

“Iha ami-nia suku ne’e karau 20 maka mate ona tanba bee menus no duut-maran atu sira han”, Xefe Suku Parlamentu, Ângelo Calvão Silva, ba Ajénsia TATOLI, ohin.

Ângelo Silva esplika katak kauza karau hirak ne’e mate tanba la konsume hahán no bee hodi aguenta moris.

“Ita hotu akompaña mudansa klimátika, iha área ne’e hanesan sentru ne’ebé karau mai hotu han iha ne’e, mas bee menus afeta karau balun mate no balun hahú krekas”, katak.

Tanba ne’e, Ângelo Silva prepara ona dadus ba karau hirak ne’ebé mate hodi entrega ba Ministériu Agrikultura no Peska (MAP) Munisípiu Lautem nian.

“Ami lori dadus ne’e ba MAP, nune’e sira bele mai halo peskiza hodi hatene loloos karau mate tanba hahán no bee menus ka moras ruma”, adianta.

Tuir dadus ne’ebé iha, Suku Parlamentu ba kada umakain, balun hakiak karau hosi lima to’o 100, maibé sistema hakiak maka balun halo luhan no balun husik de’it.

Suku Parlamentu kompostu husi aldeia lima hanesan Soi-Kili, Ipar-Ira, Lai-Ara, Moru no Ira-Ara ho totál populasaun 3.070 husi umakain 636.

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Favor intuisaun hanesan DNMG..anuncio ba Publiku tomak..konaba ba mundansa klimatika nebe akontese iha Timor ne.e…Ami povu too agora konfundi hela..tan saida mak Bailoron kleur los ne’e..no too bainhira los mak udan tau????????????

HAKEREK NO HATÁN

Please enter your comment!
Please enter your name here