Autoridade Servisu Alfandega halo hela pasa revista ba visitantes sira neebe tama sai iha Fronteira Motaain,Batugade. Imajen/Agapito dos Santos

BOBONARO,10 dezembru 2019 (TATOLI)-Servisu Imigrasaun no Alfándega iha Postu Fronteira Motain, Munisípiu Bobonaro,  sente afetadu ho problema eletrisidade ne’ebé dadaun ne’e mate-lakan tanba tenke atende servisu ba públiku  ho sistema manuál.

Tuir dadus Postu Integradu Motain iha jeradór rezerva ida, maibé iha semana kotuk hetan ona avaria, no to’o segunda horiseik, seidauk iha ekipa tékniku atu halo manutensaun.

Sarjentu Xefe Polisia Imigrasaun Xefe Postu Fronterira Batugade, Moises.Imajen /Alex Santos

Xefe Postu Servisu Imigrasaun  Fronteira Batugade, Sarjentu Xefe Polisia Moises Barros, hato’o preokupasaun ne’e, ba Jornalista Ajénsia TATOLI, segunda (09/12) iha Motain, Postu Administrativu Batugade Munisípiu Bobonaro.

Notísia Relevante:ANATL Garante Ahi La Mate Tan Iha Aeroportu

Nia dehan, Imigrasaun,  servisu ho sistema jestaun fronteira  Ka border management system  tanba ne’e, bainhira akontese  eletrisidade mate,  sistema labele rejista sidadaun sira ne’ebé tama no sai iha área fronteira.

Dadaun ne’e, Servisu Migrasaun labele rejistu eletróniku maibé taka de’it karimbu ho manuál  ba pasaporte vizitante rai-laran no estranjeiru.

“Bainhira la rejista iha sistema entaun iha tempu ruma Autoridade sira hosi Ministériu Justisa buka tuir sidadaun balun ne’ebé komete krime, ami labele buka tuir tanba agora dadaun ami atende ho manuál,”dehan, Polisia Moises Barros.

Notísia Relevante:Konsege Normaliza Ahi, La Implika Aviaun “Landing no Take Off”

Sarjentu Xefe Polisia ne’e hatutan tan, problema ne’e afeta mós ba pesoál sira  hodi fó atendementu ida ho lais no rigór ba ema barak.

“Ahi mate komesa domingu (08/10) to’o ohin (segunda 09/12) ami nia telefone mós agora labele karega entaun ami sei labele kontrola ema tama sai ho diak no masimu,”Nia informa.

Polisia Imigrasaun destaka pesoál  hamutuk na’in neen maka destaka iha Postu Fronteira Motain.

Iha biban hanesan, Diretór Autoridade Aduaneira Munisípiu Bobonaro, Alberto Seixas, informa ahi mate afeta ba servisu Aduaneira atu halo pasa revista ba sasan importasaun ne’ebé tama iha territóriu Timor-Leste.

“Karreta tula sasan barak maka para hela, labele rekolla taxa, tanba  sistema lalao no paradu totál,”informa Diretór ne’e, iha Motain.

Atu solusiona problema ne’e, Nia suzere ba Governu liuhosi Ministériu Obrás Publikás (MOP) atu koordena ho Servisu Eletrisidade  Timor-Leste (EDTL-sigla Portugés) atu fó atensaun sériu ba problema  ne’e ho emediatu no lalais.

“Ami nia pesoál sira revista deit manuál, ita labele deteta saida  de’it maka iha ema nia pasta laran, maibé kuandu ita uja sistema eletrónika bele indika sasan sira iha laran,”dehan Nia.

Karreta tula sasan importasaun husi Atambua no Kupang Indonézia barak  para  iha postu Motain durante loron-rua ona tanba ekipa servisu Aduaneira labele pasa revista ho sistema manuál hodi kobra taxa ba kofre estadu.

Diresaun Autoridade Aduaneira iha Motain iha pesoál hamutuk  na’in 24 ne’ebé fahe ba administrasaun, financas, lojistiku no seluk tan

Jornalista:Agapito dos Santos

Editór    :Francisco Simões

HAKEREK NO HATÁN

Please enter your comment!
Please enter your name here