Vogál ba asuntu administrasaun, finansa, lojístika komersialidade no rekursu umanu ANATL, Verríssimo Nai Sia. Imajen/Florencio Miranda Ximenes.

DILI, 29 novembru 2019 (TATOLI) – Vogál ba Asuntu Administrasaun, Finansa, Lojístika, Komersialidade no Rekursu Umanu Navegasaun Aérea Timor-Leste (ANATL, sigla portugés), Veríssimo Nai Sia, hateten ANATL garante ahi ka eletrisidade sei la mate iha areadór Aeroportu Internasionál Nicolau Lobato.

“Ami garante ahi (eletrisidade) sei la mate tan iha área aeroportu tanba ami finaliza ona manutesaun ba jeradór, ne’ebé bele ona kobre bainhira eletrisidade husi liña sentrál mate”, Vogal ANATL ne’e ba TATOLI iha knaar fatin aeroportu Comoro, ohin.

Verissímo Nai Sia friza, foin lalais eletrisidade mate iha areadór aeroportu tanba eletrisidade sentrál mak mate no jeradór ANATL mós avaria, mas buka meiu hodi aluga kompañia balun nian hodi antesipa eletrisidade labele mate.

“Ami halo ona manutesaun ba jeradór ANATL nian ne’ebé di’ak ona atu troka malu bainhira ahi sentrál nian mate hodi asegura atividade aeroportu nian”, katak.

Nia dehan jeradór avaria tanba pesa balun aat iha laran. “Ahi sei lamate tan iha aeroportu tanba ami-nia jeradór bele kobre nesesidade hotu ho KWA 1100″, kompromete.

Antes ne’e, eletrisidade Iha aeroportu Nicolau Lobato nian mate dala rua kuaze oras 5 nia laran ne’ebé difikulta atividade iha aeroportu.

Notísia relevante : Devita Group Apoia ANATL Rezolve Problema Jeradór Iha Aeroportu Dili

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here