DILI, 09 dezembru 2019 (TATOLI)-Ajénsia Kooperasaun Internasionál Korea (KOICA)oferese ambulánsia multifunsaun tolu ho ekipamentu kompletu ba Ministériu Saúde (MS) hodi responde preokupasaun ne’ebé mak durante ne’e komunidade no mós pesoál saúde sira kestiona.

“Ambulánsia tolu ne’ebé oferese husi KOICA ida ne’e sei distribui de’it ba Munisípiu Ainaro. Agora iha ne’e ambulánsia tolu mak  kór diferente ho ambulánsia sira seluk entaun ambulánsia tolu ne’e ajuda husi KOICA no ita bele dehan ambulánsia sira ne’e ho nia ekipamentu kompletu kompara ho multifunsaun sira iha anteriór ne’e,” Vise-Ministru Dezenvolvimentu Estratéjiku Saúde, Bonifacio Maucoli dos Reis ba jornalista, Iha Palácio das Cinzas, Caicoli, segunda (09/12/2019).

“Tanba ida ne’e mak distribuisaun ne’e sei demora uitoan atu nune’e motorista sira no mós enfermeiru sira bele tuir treinamentu tanba ekipamentu la hanesan ho ambulánsia anteriór nian,” dehan Vise-Ministru Dezenvolvimentu Estratéjiku Saúde.

Governante ne´e rekoñese, preokupasaun barak mak husi munisípiu katak karreta ambulánsia durante tinan-10 ona karreta multifunsaun aat hotu ho kondisaun ne’ebé grave tebes tanba ne’e mak MS  konsege iha tinan-2019 tau osan hola karreta multifunsaun 14 inklui ambulánsia rua.

“Karreta ambulánsia 16 oras ne’e daudaun iha ona Ministériu Saúde nia liman no hein atu distribuisaun ba 12 Munisipiu inklui RAEOA para hodi responde ba preokupasaun ne’ebé mak durante ne’e komunidade no mós pesoál saúde rasik kestiona”

“Ita hotu hatene ambulánsia hirak ne’e sosa ho orsamentu tinan-2019 hamutuk  atus ualu resin;  multifunsaun 14 no ambulánsia rua,” nia relata.

Bonifacio haklaken, ambulánsia uluk nian mak hanesan kama no osijéniu de’it maibé ambulánsia agora ne’e kompletu hanesan emerjénsia ki´ik ne’e mós iha laran hotu maibé multifunsaun sira ne’e uza orsamentu jerál estadu nian no seidauk sufisiente ba nesesidade povu  nian.

“Ita-nia espetativa ne’e atu troka multifunsaun sira ne’ebé mak distribuisaun ba tinan uluk ninian tanba ambulánsia barak mak grave ona entaun  buat sira ne’e ita hatama ona ba patrimóniu estadu no sira ne’ebé mak ita haree bele hadi’a maibé sira ne’ebé labele ita kontinua hola foun hodi halo  distribuisaun tanba manutensaun ne’e gastu osan boot di’ak liu ita hola karreta foun duke ita gasta ba manutensaun tanba kustu ba manutensaun ne’e boot liu,” nia konsidera.

Vise-Ministru Dezenvolvimentu Estratéjiku Saúde, Bonifacio Maucoli dos Reis hateten, MS iha planu katak tenke  halo  treinamentu uluk ba motorista sira no enfermeiru sira para uza sasan ne’e ba los nia fatin  tanba dalabarak utiliza sala sasan  tanba alvu ida ne’e mak importante.

“Karreta multifunsaun ne’e nia multifunsaun aleinde foti moras no nia mós bele halo atividade hanesan Servisu Integradu Saúde Komunitária (SISCA) no  saúde na família no mós bele tula ai-moruk,” nia esplika.

Notísia relevante:Ambulánsia 16 to´o Ona Dili Maibé Seidauk Entrega Ba MS

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here