Bee Manas Marobo. Imajen Tatoli/António Gonçalves

BOBONARO, 08 dezembru 2019 (TATOLI) – Xefe Suku Ilat-Laun, Postu Administrativu Bobonaro, Munisípiu Bobonaro, Juvenal Pires Amaral, hateten autoridade komunitária ho joven sira harii ona ekipa jestaun ba Bee Manas Marobo, maibé daudaun la funsiona tanba seidauk iha legalidade husi Prezidente Autoridade Munisípiu Bononaro.

“Ami uluk (2017-2018) hahú fó ona tarefa atu motór ida tama selu $1 no karreta $5, maibé agora paradu tanba ami laiha baze legál. Ami halo regulamentu operasionál ba munisípiu atu aprova, maibé to’o agora seidauk iha resposta”, Xefe Suku ne’e ba TATOLI, domingu ne’e.

Nune’e, Juvenal Dias Ximenes dehan xefe suku tolu iha kompleksu (kompleks) Marobo ne’e tuur hamutuk ona hodi halo regulamentu operasionál no entrega ba Prezidente Autoridade Bobonaro, mas seidauk aprova.

“Ami hein regulamentu operasionál ne’e atubele hahú fali operasaun hodi jere Bee Manas Marobo”, katak.

Xefe Suku Ilat-Laun (Foho-Leten) ne’e dehan hahú husi 2017 to’o 2018, kuandu loron boot hanesan Natal no tinan foun inklui finadu bele rekolla $700 to’o 900, mas loron bain-leet dala ruma fulan ida menus husi 100.

“Ami uluk halo ne’e osan sira ne’e atu halo manutensaun ba uma hirak ne’e no 2018 udan boot ne’ebé atu sobu ne’ebé ami uza osan ne’e hodi hala’o barreira inklui seluk ekipa hein bee-manas ne’e”, afirma.

Hatán ba kondisaun uma no ekipamentu iha Bee Manas Marobo, autoridade lokál ne’e dehan mós hahú aat.

Nia husu Governu atu halo reabilitasaun, kuandu la halo maka mak tinan sira tuirmai bele dodook hotu no husu ba Prezidente Autoridade atu aprova lalais regulamentu operasionál, nune’e iha 2020 bele jere fali.

“Ita hakarak ema estranjeiru no nasionál vizita, ita presiza kria kondisaun, liuliu estrada, se lae ema lakohi mai”, sujere.

Entretantu, abitante Ilat-Laun Maria da Cruz dehan Bee Manas Marobo ne’e laiha ema ida mak hein.

“Ita haree abandona de’it ona, ami sira ne’e mak haree ema mai vizita entaun ami mai fa’an sasán ka hahán,” afirma Maria.

Nia dehan besik tinan ida ona Bee-Manas Marobo ne’e ema la hein no vizitante tama ho gratuita.

Bee-Manas Marobo ne’e, konstrui no reabilita hosi SEFOPE iha 2015 ho valór orsamentu $498,860 no inaugura iha 08 dezembru 2016 husi Ministru Planeamentu no Investimentu Estratéjiku, Kay Rala Xanana Gusmão, no Sekretáriu Estadu ba Polítika Formasaun Profisionál no Empregu (SEPFOPE), Ilídio Ximenes da Costa, iha Sestu Governu Konstitusionál nia tempu.

Notísia relevante : Presiza Halo Manutensaun ba Infraestrutura Bee Manas Marobo

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here