Xefe Suku Atu-Aben, Postu Administrativu Bobonaro, Munisípiu Bobonaro, Januário Fernandes. Imajen TATOLI/Antónia Gusmão.

BOBONARO, 07 dezembru 2019 (TATOLI) – Bailoro naruk iha tinan ne’e, afeta bee-matan sira iha suku Atu-Aben, Postu Administrativu Bobonaro, Munisípiu Bobonaro, menus hodi difikulta abitante sira-nia nesesidade loron-loron.

“Ami nian bee-matan kuaze menus ne’ebé difikulta tebes ha’u-nia komunidade liuliu estudante sira tanba la’o kuaze kilómetru 10 mak foin kuru bee”, Xefe Suku Atu-Aben, Januário Fernandes, ba TATOLI, sábadu ne’e.

Autoridade lokál ne’e dehan maski instalasaun ezistente iha ona, maibé bee mak menus duni ne’ebé hahú kria ona oráriu atu loke ba kada aldeia hodi abitante bele asesu bee-moos.

Aléinde ne’e, Januáriu Fernandes dehan umakain iha rezidente ne’e kuaze porsentu 15 seidauk asesu liña eletrisidade, ne’ebé husu atu Governu toma atensaun.

Hatán ba kestaun ne’e, Fasilitadór Bee no Saneamentu Postu Administrativu Bobonaro, Munisípiu Bobonaru, Crispim Moniz, rekoñese bee menus duni iha suku Atu-Aben, la’ós suku ne’e de’it, más suku seluk iha área Marobo hotu.

“Ami hahú esforsu ona atu jere rekursu bee ne’ebé iha hodi komunidade bele asesu hotu ho di’ak”, katak.

Crispim Moniz adianta daudaun ne’e uza sistema instalasaun ho métodu tolu hanesan; dahuluk, gravitasaun (dada bee husi leten mai okos) iha bee-matan ida iha suku Tapo hodi fornese ba suku Malilait, Aiasa, Atu-Aben, Soilesu, Ilatlaun, Lourba, no Oeleu.

Daruak, Sistema hidrolic Pam (dada bee husi okos ba leten) iha bee-matan Soilesu hodi fornese ba komunidade iha aldeia rua hanesan, Soilesu ho Talite.

Datoluk, uza sistema eletrisidade hodi dada bee husi foho okos bá leten ne’ebé konesaun ka joint husi sistema hidrolic Pam hodi dada bá suku  iha área Marobo hanesan Soilesu, Ilatlaun ho Atu-Aben.

Nune’e, Fasilitadór Bee no Saneamentu ne’e dehan maski bee menus, maibé sei jere hodi abitante sira Iha Marobo bele asesu bee.

“Ami-nia área ne’e kuandu tempu udan, bee liu komunidade, mas tinan ne’e mak foin menus”, katak.

Totál populasaun iha suku Atu-Aben hamutuk 1018 husi umakain 219 ho aldeia rua mak Talite no Atu-Aben.

Notísia relevante : Produtu Ortíkula La Folin iha Suku Atu-Aben Tanba Estrada Difikulta

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here