Diretora Jeral Ministeriu Justisa, Marcelina Tilman. Imajen/ Domingos Piedade

DILI, 05 dezembru 2019 (TATOLI) – Diretora Jerál Ministériu Justisa, Marcelina Tilman, hateten, semináriu kona-ba krime ekonómiku no finanseiru presiza tebes ba Timor-Leste partilla informasaun ba malu kona-ba mekanizmu no asaun kombate krime ekonómiku no finanseiru iha Timor-Leste.

Notísia Relevante :Prevensaun Krime Ekonómiku no Finanseiru iha Timor-Leste 

“Ha’u hanoin nu’udar nasaun foun presiza kombate ou prevene krime ekonómiku no finanseiru hanesan direitu penal ekonómiku, krime ekonómiku no negósiu, krime finanseiru no brankamentu kapitál atu buat hot-hotu lao tuir nia dalan,” afirma Marcelina Tilman ba Ajénsia TATOLI, bainhira partisipa semináriu kona-bs krime ekonómiku no finanseiru iha Edifísiu Ministériu Finansa, Ai-tarak Laran, Dili, kuarta (04/12/2019).

Nia fiar katak, hosi semináriu ne’e fó vantajen boot tebetebes ba iha órgaun judisiál sira hanesan juiz, advogadu privadu, prokuradór, defensór, investigadór sira seluk atu bele iha koñesimentu natoon hodi prontu kombate krime finanseiru no ekonómiku iha futuru.

Komisáriu KAK, Sergio Hornai. Imajen/António Gonçalves.

Iha biban hanesan, komisáriu Komisaun Anti Korrupsaun, Sergio Hornai hateten, materia semináriu  ne’ebé mak fó hosi peritu internasionál kona-ba krime ekonómiku no finanseiru nu’udar krime ida ne’ebé sempre komete hosi ema sira ne’ebé mak kualifikasaun aas.

“Ha’u hanoin iha Timor Leste mós presiza kombate krime ida ne’e liuliu liga ho lavazem de dinheiro tamba ema ne’ebé mak uza osan Estadu bele halo fila fali ba buat seluk hanesan ba sosa droga, kokaina no seluk tan iha fronteira tasi,” tenik Sergio Hornai.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here