DILI, 04 dezembru 2019 (TATOLI)-Uniaun Europeia parseiru ho Instituto Camões, Kuarta ohin,  organiza konferénsia internasionál ida ho objetivu atu halo prevensaun no kombate krime ekonómiku,  no finanseira iha Timor-Leste ba futuru.

Konférensia Internasionál ne’e,  realiza iha salaun Ministériu Financas Ai-tarak laran Dili, durante loron tolu hahú Kuarta 04 to’o 06 fulan-dezembru 2019.

Oradór ba eventu internasionál  ne’e,  maihosi peritu nasionál no internasionál sira ho topiku aprezentasaun sira hanesan diretu penál ekonómiku, krime ekonómiku, krime finanseira, brankamentu kapitál, dezafiu ba prevensaun no kombate krime ekonómiku, fraude obtensaun subsídiu penál no asuntu sira seluk tan.

Xefe Delegasaun Uniaun Europeia iha Timor-Leste, Simon Legrand, garante ho  topiku aprezentasaun hirak ne’e,  sei hasa’e abilidade no koñesimentu entidade judisiária sira hanesan Polisia Sientífika Investigasaun Kriminál(PCIC-sigla Portugés), Komisaun Anti Korrupsaun (CAC-sigla Portugés), Inspesaun Jerál Estadu (IJE), Juis, prokuradór atu halo investigasaun profunda ba kazu fase osan, brankamentu kapitál, fraude fiskál, partisipasaun ekonómiku no seluk tan.

Iha Parte seluk, Komisáriu Anti Korrupsaun, Sergio Hornay, konsidera  konferénsia internasionál ne’e importante tebes ba servisu investigadór sira atu hala’o investigasaun  ba  krime ekonómiku no finanseiru iha Timor-Leste.

Diretóra Jerál Ministériu Justisa, Marcelina Tilman, reprezenta Ministru Justisa, Manuel Carcéres da Costa, hato’o agradese ba Uniaun Europeia ho Instuto Camões tanba organiza ona eventu ne’e.

“Eventu ne’e importante tebes oinsa bele mellora ba efisiénsia no efikas,”dehan, Diretóra Jerál ne’e,  iha Ai-tarak Laran Dili,ohin.

Entretantu, Konferénsia Internasionál ne’e partisipa hosi  Investigadór KAK, PSIK, Prokuradór, Defensór Públiku no Entidade Judisioária , Estudante husi Fakuldade Diretu Universidade Nasionál Timor Lorosa’e (UNTL) no seluk tan.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here