DILI, 05 dezembru 2019 (TATOLI)—Rejimentu Parlamentu Nasionál artigu 95 númeru 2 mak fó dalan ba Governu retira proposta Lei nú. 8/V(2ª) kona-ba orsamentu jerál Estadu (OJE) 2020 hosi Parlamentu Nasionál (PN).
“Tuir Rejimentu Parlametu Nasionál artigu 95 iha númeru 2 dehan: admitidu tiha kualkér projetu ka proposta lei ka proposta alterasaun, ninia autór bele retira fali to’o votasaun iha jeneralidade. Bazeia ba rejimentu ne’e mak Governu hanesan proponente ba proposta Lei nú. 8/V (2ª) bele retira fali antes aprova iha jeneralidade. Tanba ne’e, iha kabimentu rejimentál ba asaun deklarasaun señor Primeiru-Ministru hanesan autór ba proposta Lei refere”, Prezidente Parlamentu Nasionál, Arão Noé de Jesus da Costa Amaral, informa ba Agência TATOLI, iha Dili, kinta ne’e, hodi responde ba preokupasaun Padre Júlio Crispim Ximenes Belo nian.
Lee mós: Retira OJE 2020, Jurídika Konstitusionalmente Inezistente
Nia argumenta, haree hosi debate kuaze bankada Parlamentár hotu iha PN inklui opozisaun sujere ka propoin ba Governu atu dada fali proposta Lei nú. 8/V (2) ba reformula tiha ka hadi’a tuir rekomendasaun Komisaun C (Finansa Públika) no komisaun 6 seluk ninia pareser ne’ebé junta iha Komisaun C nia relatóriu no pareser.
“Tanba ne’e, señor Primeiru-Ministru konsidera no retira proposta OJE 2020 ne’e. Sujestaun bankada no deputadu sira ba Governu atu retira bazeia ba artigu 95 nú. 2 ne’e, la’ós laiha baze rejimentál mak bankada ka deputadu sira sujere ne’e la loos”, Prezidente Parlamentu Nasionál subliña.
Nia hatutan bankada no deputadu barak mak sujere ba Governu atu retira mak Governu lakohi retira ne’e kompeténsia Governu nian.
“Se Governu la retira, votasaun iha jeneralidade ba proposta Lei nú. 8/V/(2) bele la pasa. Ne’e mak grave. Tanba, tuir artigu 97 nú. 3 hateten: proposta lei ka projetu lei ne’ebé rejeitadu labele aprezenta fali iha lejizlativa ne’e nia laran. Tuir ita-nia sistema lejizlativa ida hahú iha 15 setembru, tinan oin”, Arão tenik.
Nia afirma, se proposta Lei OJE 2020 mak liuhosi votasaun iha jeneralidade mak PN rejeita ka kontra ka la pasa, mak Governu só bele aprezenta fali iha15 setembru 2020.
“Aproveita ida-ne’e hodi agradese ho kle’an ba Governu liuhosi Primeiru-Ministru ne’ebé deklara dada fali proposta lei refere ba hadi’a nune’e prosesu debate no aprovasaun nakloke nafatin no la husik Estadu monu ba krize finanseira”, nia haklaken.
Jornalista: Evaristo Soares Martins
Editór: Xisto Freitas
