Prezidente Konsellu Konsultivu Fundu Petrolíferu (KKFP), Amu Júlio Crispim Ximenes Belo. Foto/Google.

DILI, 04 dezembru 2019 (TATOLI)–Koordenadór Gabinete Jurídiku Conferencia Episcopál Timoroan (CET), Padre Júlio Crispim Ximenes Belo, konsidera Governu retira proposta Lei Orsamentu Jerál Estadu (OJE) 2020 husi Parlamentu Nasionál (PN), jurídika konstitusionalmente inezistente.

“Kona-ba faktu Governu retira proposta Lei Orsamentu Jerál Estadu 2020 husi Parlamentu Nasionál, iha loron daruak debate Jeneralidade, ne’e situasaun estrañu ida iha prosesu ne’e tomak, tanba Konstituisaun RDTL ho Rejimentu Parlamentu Nasionál la prevee. Entaun, aktu Governu retira proposta Lei OJE husi PN ne’e, jurídika konstitusionalmente inezistente”, Padre Júlio esplika iha ninia rezidénsia, Praia dos Coqueiros, Dili, ohin.

Tuir loloos, Prezidente Konsellu Konsultivu Fundu Petrolíferu ne’e hateten, maski iha pro no kontra entre deputadu sira durante debate iha Parlamentu Nasionál, maibé, husik la’o to’o faze ida aprova ka la aprova, tanba Governu mai atu esklarese no esplika razaun alokasaun orsamentu ne’ebé sira halo.

“Laiha artigu ruma iha Konstituisaun RDTL no mós Rejimentu PN ne’ebé dehan atu retira orsamentu husi PN iha loron daruak debate jeneralidade”, nia subliña.

Iha pontu ida tan mak jurista ne’e observa katak maski Governu rasik maka hakarak atu retira Lei OJE, maibé tuir loloos Parlamentu labele autoriza hodi retira tanba ne’e tama ona iha prosesu legál debate OJE nian no hakarak ka lakohi tuir loloos tenke avansa to’o prosesu finál votasaun jeneralidade ho espesialidade atu pasa ka la pasa.

Lee mós: Governu Dada Proposta OJE 2020 Husi PN

Amu Júlio hatutan, bainhira PN haree katak montante orsamentu ne’e boot liu, entaun tenke halo redusaun iha debate ne’e nia laran tuir lei haruka.

Nia fó ezemplu, bainhira haree katak montante orsamentu ne’e boot liu no Primeiru-Ministru hakarak halo redusaun, Primeiru-Ministru rasik tenke tuur iha plenária no esklarese ba deputadu sira katak tenke halo redusaun ba persentajen ida-ne’e.

Aleinde ne’e, nia haklaken, kuandu ministériu ida hakarak halo redusaun, nune’e ninia ministru tenke tuur iha plenária no esklarese ba deputadu sira iha debate espesialidade katak tenke halo redusuan ba verba ida-nee ho persentajen ida-ne’e.

Iha prosesu normál tuir lei, Padre Júlio esklarese, se halo ona redusaun, tenke haruka fali ba komisaun C atu halo tuir fali redusaun bazeia ba rezultadu debate no ikus liu maka aprezenta atu halo votasaun.

“Bainhira to’o iha nível ida aprovasaun ninian, katak, iha ona konkordánsia entre PN ho Governu, klaru katak orsamentu ne’e pasa, maibé la’ós retira”, nia afirma.

Kona-ba konsekuénsia husi retira ne’e maka, Padre Júlio argumenta, kestaun tempu ne’ebé konstituisaun no rejimentu determina, tanba oinsá karik sei sura husi loron ne’ebé Prezidente Parlamentu simu proposta Lei OJE husi Governu iha 16 outubru, ka sei sura husi loron ne’ebé hatama fila fali hafoin retira tuir promesa Governu iha 13 dezembru, tinan ne’e.

“Entaun, prosesu sira-ne’ebé durante ne’e la’o ona inklui aktu sira husi komisaun sira sei inválidu, ka sei sura nafatin. Ida-ne’e duni mak sai nu’udár problema ne’ebé ita enfrenta tanba kestaun tempu. Data ne’e implika konstituisaun ne’ebé dehan, kuandu la permite aprova OJE liu loron 60 nia laran, K-RDTL artigu 86 alínea f fó dalan ba Prezidente Repúblika tenke disolve Parlamentu Nasionál”, Padre subliña liután.

Jurista ne’e esplika kona-ba prosesu elaborasaun OJE 2020, katak hahú kedas husi artigu 145 Konstituisaun Repúblika Demokrátika Timor-Leste (K-RDTL), Governu mak elabora liuhusi prosesu ida-ne’ebé hanaran yelow road, nu’udár dalan ida atu tuir durante prosesu elaborasaun to’o aprovasaun iha Konsellu Ministru, ne’ebé sai proposta Lei OJE ba Parlamentu Nasionál.

Nia dehan, bainhira Prezidente Parlamentu Nasionál simu proposta Lei Orsamentu Jerál Estadu ne’e, despaixu tun kedan ba komisaun sira no durante loron 15 nia laran, komisaun sira estuda, observa no analiza orsamentu ne’e rasik, sentraliza iha komisaun C.

Hafoin analiza, nia hatutan, komisaun C halo relatóriu ida ba Prezidente Parlamentu Nasionál atu bele lori ba halo aprovasaun jeneralidade.

Tanba ne’e, Padre Júlio Crispim fundamenta katak, tuir rejimentu PN, iha diskusaun jeneraliade tenke loron tolu no debate espesialidade labele liu loron sanulu, katak, bele loron ida, bele loron rua, ka bele mós loron sia.

Jornalista: Cipriano Colo

Editór: Xisto Freitas

2 KOMENTÁRIU

HAKEREK NO HATÁN

Please enter your comment!
Please enter your name here