Ekipa AIFAESA halo inspesaun iha merkadu Taibesi. Imajen/Natalino Costa.

DILI, 03 dezembru 2019 (TATOLI) – Xefe Divizaun Operasaun Autoridade Inspesaun no Fiskalizasaun Atividade Ekonómika no Sanitária (AIFAESA), Alfonsius Costa Akoyt, afirma AIFAESA sei halo inspesaun rutina bá loja no supermerkadu iha Dili laran atubele asegura produtu hotu ne’ebé fa’an iha loron boot Natál.

“Ami iha ona planu katak iha fulan ne’e, ami mós sei halo inspesaun rutina bá loja no supermerkadu sira iha kapitál”, dehan nia ba Ajénsia TATOLI iha merkadu Manleuana, ohin.

Atividade inspesaun ne’e ho baze ba planu prioridade ne’ebé trasa ona ba dezembru nian, katak inspesaun bá merkadu Taibesi, Manleuana no sei kontinua reúne ho autoridade lokál sira inklui administradór postu Dili, nune’e mós Polísia hodi tulun malu bainhira AIFAESA halo inspesaun bele asegura.

Iha ámbitu inspesaun horisehik, AIFAESA identifika no halo apreensaun ba produtu hamutuk 1.800-resin ho tipu produtu hanesan sigarru surya lauza sticker, dose, fanta no big kola iha Taibesi, no ohin iha Manleuana, identifika produtu ne’ebé hanesan hamutuk 400-resin tanba liu prazu.

Negosiante sira ne’ebé halo infrasaun, bazeia ba dekretu lei númeru 14/2016, kona-ba sigarru ne’ebé la ho sticker, bele hetan koima $50 to’o $100 maibé depende ba tipu infrasaun, nune’e mós produtu ne’ebé liu prazu ho baze dekretu lei númeru 24/2017 no sei multa $1000 to’o $10.000, enkuantu produtu hirak ne’ebé apreendidu sei halo destruisaun bazeia ba dekretu lei númeru 23/2009.

Enkuantu, aplika multa ba negosiante sira ne’ebé komete irregularidade, barak hetan ona sansaun ka koima maibé, Alfonsius Akoyt la lembra ema na’in hira no osan hira maka selu ona ba Estadu.

Notísia relevante : AIFAESA Halo Apreensaun Ba Produtu 1.800-Resin Iha Merkadu Taibesi

Jornalista : Natalino Costa 
Editora : Maria Auxiliadora

HAKEREK NO HATÁN

Please enter your comment!
Please enter your name here