DILI, 03 dezembru 2019 (TATOLI)-Sekretária Estadu Igualdade no Inkluzaun (SEII) hala’o kampaña hapara violénsia kontra feto no labarik.
Notísia Relevante : SEII ho Sosiedade Sivíl Fó Advokasia Ba Kombate Violénsia Doméstika
Kampaña durante loron 16, hahú hosi loron 25 novembru to’o loron 10 dezembru 2019, nu’udar alerta ida ba públiku atu hakribit violénsia kontra feto no labarik.
Sekretaria Estadu Igualdade no Inkluzaun (SEII), Maria José da Fonseca Monteiro, ohin, iha Parlamentu Nasional, informa ba Ajénsia TATOLI katak, kampaña ne’e la’ós konsentra de’it iha Dili maibé iha munisípiu 12, inklui mós Rejiaun Administrativu Espesiál Oe-Cusse Ambeno (RAEOA).
“Ita esforsu loron-loron koko atu labele uza violénsia, husu ema atu hakribi violénsia hahú hosi ema ida-idak,” afirma Maria José da Fonseca Monteiro.
Alvu SEII nian ba kampaña ne’e mak hanesan hala’o sensibilizasaun ba estudante sira, formasaun ba prizioneiru, semináriu, sosializasaun lei kontra violénsia doméstika hasoru feto no labarik. Nune’e mós hala’o kampaña kona-ba abuzu sexuál no haforsa feto foti desizaun.
Jornalista : Nelson de Sousa
Editór : Francisco Simões
