Primeiru-Ministru aprezenta proposta orsamentu jerál Estadu 2020 iha Parlamentu Nasionál. Imajen Tatoli/ Egas Cristóvão.

DILI, 03 dezembru 2019 (TATOLI)–Primeiru-Ministru (PM), Taur Matan Ruak, konsidera ambiente polítika oras ne’e iha Parlamentu Nasionál sai lisaun boot ba demokrasia iha rai ida-ne’e.

Primeiru-Ministru ko’alia asuntu ne’e tanba bankada Governu ne’ebé hahoris Governu ho forsa agresivu.

Tuir Xefe Governu nia haree, diskusaun orsamentu 2020 iha diferensa, tanba normalmente Parlamentu fahe ba rua–bankada Parlamentár ne’ebé sustenta Governu defende Governu maka’as loos, nunka hateten lae, no opozisaun mak kritítika hateten labele gasta osan.

Lee mós: Governu Dada Proposta OJE 2020 Husi PN

“Daudaun ne’e ha’u haree oin seluk. Bankada Parlamentár ne’ebé sustenta Governu ho forsa agresivu, satán opozisaun. Ha’u hanoin ne’e ambiente foun ida, oportunidade ida no lisaun boot ba ita-nia demokrasia”, intervensaun Primeiru-Ministru, Taur Matan Ruak, iha debate loron daruak jeneralidade proposta orsamentu jerál Estadu (OJE) 2020, iha Plenária Parlamentu Nasionál, tersa ne’e.

Nia afirma, Governu simu krítika sira no tau iha konsiderasaun, maibé destinu aprovasaun orsamentu 2020 kompeténsia Parlamentu nian.

“Governu prontu kolabora atu hadi’a proposta OJE 2020”, Taur deklara.

Deklarasaun Xefe Governu nian refere ba relatóriu Komisaun C ne’ebé konsidera OJE 2020 inkonstitusionál tanba viola Lei Jestaun Finanseira.

Lee mós: Relatóriu Pareser Komisaun C: OJE 2020 Inkonstitusionál

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here