Primeiru-Ministru, Taur Matan Ruak, hamutuk ho membru Governu sira partisipa iha diskusaun jeneralidade OJE 2020 ba loron daruak nian iha Parlamentu Nasionál (PN), tersa ne'e. Imajen Tatoli/ Egas Cristóvão.

DILI, 03 dezembru 2019 (TATOLI)—Relatóriu Komisaun C ne’ebé trata Asuntu Finansa Públika, konsidera orsamentu jerál Estadu (OJE) 2020 inkonstitusionál, tanba kontra Lei Orsamentu no Jestaun Finanseira.

“Ami-nia entendimentu kona-ba dezignasaun legál iha orsamentu hanesan OJE, tanba ne’e eskollidu hosi lejizladór konstituente. Dezignasaun OJE adotada hosi Lei Orsamentu no Jestaun Finanseira ne’e inkonstitusionál no labele adota, tanba la bazeia ba lei aprovasaun OJE iha tinan fiskál 2016”, konkluzaun no rekomendasaun pareser setoriál Komisaun A, B, D, E, F no G ne’ebé lee hosi membru Komisaun C, Relatór Deputadu Noé da Silva Ximenes, iha plenária Parlamentu Nasionál, segunda ne’e.

Relatóriu pareser hosi Komisaun C, haktuir hahú hosi tinan 2016, lei aprovasaun OJE la’ós orsamentu Estadu. Ezemplu, iha preámbulu OJE 2016 hanesan últimu molok orsamentu seguransa sosiál, ne’ebé hanaran OJE 2016, kompostu hosi reseita no despeza iha tinan fiskál refere.

Relatóriu Komisaun C ne’e hateten dezde 2009 eziste Lei Orsamentu no Jestaun Finanseira no tinan 2017 hahú OJE hodi halo diferensa entre orsamentu jerál Estadu (OJE) no orsamentu Estadu (OE).

Aleinde ne’e, membru Komisaun A, Deputadu Francisco Vasconcelos, hateten pareser hosi Komisaun C no komisaun hotu-hotu katak orsamentu 2020 ne’e konfronta ho Lei Jestaun Finanseira, maibé agora haree to’ok Primeiru-Ministru hanesan Xefe Governu nia argumentu.

“Kona-ba inkonstitusionál tanba orsamentu ida-ne’e konfronta ho Lei Jestaun Finanseira. Klaru katak asesór no jurista na’in-tolu bele interpreta artigu ne’e la hanesan. Ezemplu, transferénsia orsamentu uma ba kbiit-laek sira loloos ne’e tama iha munisípiu nian, maibé ida-ne’e tama fali iha Estatal nian. Ne’e maka konfronta ho Lei Jestaun Finanseira”, nia dehan ba Agência TATOLI, tersa ne’e.

Nia propoin proposta ida atu orsamentu ne’e prevee ba rúbrika munisípiu nian.

Hatán ba kestaun ne’e, Primeiru-Ministru, Taur Matan Ruak, hateten kestaun legál no konstitusionál, estrutura orsamentál no modelu orsamentál, ne’e mensajen ida-ne’e ba Governu katak orsamentu ida-ne’e boot liu tenke halo alterasaun. Parlamentu nu’udar órgaun soberanu ida iha responsabilidade no kbiit ba ida-ne’e liuhosi argumentasaun no bele kestiona.

“Ita komprende tanba ita-nia asesór sira-ne’ebé hakerek, maibé kestaun balun ami preokupa uitoan liuliu konstitusionalidade, dehan Orsamentu Jerál Estadu ida-ne’e inkonstitusionál ha’u hanoin la loos”, Xefe Governu fó resposta ba relatóriu Komisaun C nian.

Tanba, nia esplika, Konstituisaun artigu 95, uza espresaun Orsamentu Estadu.

Xefe Governu haktuir, iha tinan 2019, konstituisaun no parlamentár seidauk muda, derrepende dehan inkonstitusionál.

“Ne’e ami preokupa, liuliu nível koñesimentu asesór sira-nian. Segundu, ha’u sei Prezidente Repúblika, ha’u haruka ba Tribunál no Tribunál konfirma katak Parlamentu iha razaun, maibé Prezidente laiha razaun. Agora, Parlamentu dehan la loos iha Lei Jestaun Finanseira nu’udar lei forsada ida”, Xefe Governu katak liuhosi debate jeneralidade loron daruak, ohin.

Xefe Governu hatutan, foin lalais iha Lei Atividade Petrolífera laiha reforsadu.

“Erru sira hanesan ne’e grave uitoan. Ha’u hanesan Primeiru-Ministru entrega ba iha Parlamentu Nasionál mak halo desizaun saida de’it, Governu prontu koopera”,  Taur haklaken.

Primeiru-Ministru sente kontente tanba OJE 2020 hamosu debate barak.

Xefe Governu sente kontente liu tanba relatóriu Komisaun C nian ko’alia kona-ba modelu desenvolvimentu.

“Hafoin Funu Mundiál Daruak, iha modelu haat (4) maka hanesan modelu liberál, baze industrializasaun, sosializmu no sustentável”,  Taur tenik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here