Ministra Finansa en-ezersísiu, Sara Lobo Brites. Imajen Tatoli/ Egas Cristóvão

DILI, 03 dezembru 2019 (TATOLI)—Oitavu Governu Konstitusionál lideradu Primeiru-Ministru, Taur Matan Ruak, prevee millaun $6 ba pagamentu pensaun vitalísia iha proposta orsamentu jerál Estadu (OJE) 2020.

Orsamentu ho valór millaun $6 ne’e prevee liuhosi kategoria transferénsia orsamentu.

Ministra Finansa Interina, Sara Lobo Brites, esplika orsamentu ne’e prevee hodi sustenta eis titulár sira, hahú hosi governasaun dahuluk to’o oras ne’e.

“Pensaun vitalísia ne’e tinan-tinan ita tau orsamentu tanba ita sukat eis membru Parlamentu, eis membru Governu, maibé ida-ne’e hanesan orsamentu de’it”, nia informa ba jornalista sira, iha resintu Parlamentu Nasionál, tersa ne’e.

Sara tenik, oras ne’e eis titulár balun sei ativu hela serbisu la simu sira-nia direitu.

“Orsamentu ne’e tau natoon ba membru titulár eis ezistente. Lei hateten sira-nia direitu tenke selu”, governante ne’e esplika.

Lee mós: Governu Planeia Reforma Lei Pensaun Vitalisia

Nia hatutan, ba eis titulár ne’ebé la serbisu ona sempre hetan pagamentu kada tinan bazeia ba lei haruka.

“Pensaun vitalísia ne’e ba sé de’it mak eis membru Governu, eis membru Parlamentu no oras ne’e sira iha ona Kinta Lejizlatura ne’e sé-sé mak la ativu ona, ita tenke tau osan”, Sara Lobo hatutan.

Nia haklaken, orsamentu millaun $6 ne’e mós prevee ba Eis Prezidente Repúblika, Eis Prezidente Parlamentu Nasionál, Eis Prezidente Tribunál Rekursu no Eis Primeiru-Ministru.

Ministra Sara Lobo lakohi fó-sai númeru eis titutár ne’ebé oras ne’e la ativu ona.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here