ESTV, Becora, Dili. Imajen Google

DILI, 26 novembru 2019 (TATOLI)—Diretór Eskola Sekundária Tékniku Vokasionál-Grupu Teknolojia Indústria (ESTV-GTI) Becora, Fransisco Guterres, informa Eskola Sekundária Tékniku Vokasionál nu’udar eskola públika ne’ebé tutela ba iha Ministériu Edukasaun, Diresaun Ensinu Sekundáriu Tékniku Vokasionál.

Diretór Eskola Sekundária Tekníka Vokasionál-Grupu Teknolojia Indústria (ESTV-GTI) Bekora, Francisco Guterres.

Eskola Sekundáriu Tékniku Vokasionál ne’e, nia hatutan, ninia transformasaun mai husi Sekolah Teknik Menengah (STM) ne’ebé mak funda iha tempu okupasaun Indonézia iha tinan 1986 liubá ne’e

Nia haktuir, Sekolah Teknik Menengah (STM) ne’e harii inisiativa mai husi  Eis-Governadór Timor-Timur, Saudozu Mário Viegas Carrascalão (matebian) nia tempu, iha 1996—1999 bainhira povu Timor-Leste manan ukun rasik-aan liuhusi Konsulta Populár 30 Agostu 1999.

Rezultadu husi referendu ida ne’e, nia dehan, determina povu Timor-Leste nia terus hodi haketak aan husi nasaun Indonézia. Iha 2000, hafoin ukun-aan, iha fulan Jullu 2000 hahú reativa fali eskola ne’e. Inisiativa ne’e mai husi profesór timoroan sira ne’ebé iha tempu okupasaun Indonézia, sira hanorin no mai husi alumni sira ne’ebé uluk eskola iha STM refere.

Iha momentu 2000 bainhira reativa fali eskola ne’e ho naran Eskola Tékniku Vokasionál Dili, Hafoin la’o tinan rua ka tolu nia laran, hahú muda fali eskola ne’e nia naran “Eskola Tékniku Profesionál Becora”. Durante la’o, eskola ne’e hahú adapta aan ho Governu liuliu Ministériu Edukasaun nia programa liuhusi Diresaun Nasionál Tékniku Vokasionál nakfila aan sai fali Eskola Tékniku Vokasionál-Grupu Teknolojia Indústria Becora.

Naran: Eskola Sekundária Tékniku Vokasionál-Grupu Teknolojia Indústria (ESTV-GTI).

Lokaliza: Iha Becora, Dili, Dili Leste.

Harii: Iha 1986 no hahú funsionamentu iha 1989.

Fundadór: Eskola Tékniku Vokasionál ka Sekolah Teknik Menengah (STM) ne’e, harii husi Saudozu Mário Viegas Carrascalão.

Lema: Construir o Futuru ka Membangun Massa Depan. Tanba ne’e sira ne’ebé tama mai iha eskola tékniku vokasionál, sira tenke iha ona hanoin ida katak sira tenke dezenvolve sira-nia futuru atu kontribui ba iha dezenvolvimentu nasaun nian.

Prosesu Konstrusaun Eskola: Konstrusaun ne’e harii husi ema Indonézia sira no inaugura husi Prezidente Indonézia, Soeharto. Hafoin halo rehabilitasaun

Diretór Eskola: Francisco Guterres (agora).

Diretór Eskola Primeiru: Tomas Xavier (2000-2002), Domingos da Silva Guterres (2002-2006), Fransisco Pinto (2006-2009), José dos Santos (2009-2012), Abel Ximenes (2012-2016), no Francisco Guterres (2016 to’o agora) liuhusi konkorsu por meritu.

Totál Profesór: Hamutuk na’in 102 (permanente na’in 74, kontratadu na’in 14 [Governu mak selu], voluntáriu na’in neen (6), profesór internasiónal husi Korea liuhusi Ajénsia KOICA na’in 7 (língua Korea na’in tolu (3), Tékniku Informasaun (IT) na’in rua (2), Mekánika na’in ida (1), Asesór na’in ida (1) ne’ebé mak Governu Korea mak selu).

Totál Estudante: Hamutuk na’in 1.185 (kompostu husi mane na’in 909 no feto na’in 276).

Objetivu Harii Eskola: Oinsá atu dezenvolve jestaun institusionál ne’e iha prosesu ensinu tékniku ninian no oinsá atu bele prodús ho rezultadu ida ne’ebé ho kualidade profesionál iha área téknika.

Vizaun: Oinsá atu bele dezenvolve kualidade Ensinu Tékniku Vokasionál ne’ebé prodús rezultadu ne’ebé sai nu’udar barometru ida atu orienta rezultadu sira iha merkadu traballu.

Misaun: Oinsá atu bele prepara ajente ho kualifikadu atu nune’e bele kompete iha kampu traballu. Aleinde ida ne’e mós bele prodús estudante ne’ebé ho kualidade ho moralidade umanista no mós vizionária.

Sala  Aula: Hamutuk 16. Sala ba teória, salas ofisina iha neen (6) tuir área ka departamentu neen (6) ne’ebé eziste iha eskola tékniku vokasionál. Biblioteka ida (1), sala ba profesór/a hamutuk hitu (7), sala prátika ualu (8), aula salaun ida (1), kantina ida (1), sala reuniaun konsellu profesór ida (1) no ofisina aberta ida (1).

Konsellu Sira: Iha Eskola ESTV-GTI Becora ne’e iha Konsellu Profesór, Konsellu  País (inan-aman) no Konsellu Estudante.

Lia Tatoli: Eskola Sekundáriu Tékniku Vokasionál-Grupu Teknokojia Indústria Becora, nu’udar eskola referénsia ba eskola tékniku vokasionál hotu iha Timór laran. Se sira (Timor laran) hatene ona eskola ne’e sai nu’udar eskola referénsia, ba estudante sira ne’ebé hakarak mai iha eskola ne’e estudante sira ne’ebé nu’udar kompetitor di’ak mak mai.

Maibé ba estudante ne’ebé mai harame de’it, sira labele dura iha eskola ne’e tanba sira laiha vokasaun. Tanba tékniku ne’e ema ne’ebé  tenke ka’er foer no prátika ona ne’e estudante sira tenke fo´er.

Ohin loron, Ministériu Edukasaun liuhusi Diresaun Ensinu Sekundária Tékniku Vokasionál, konversa ona ho eskola sekundariu jerál sira atu nakfila aan sai eskola tékniku. Ne’e katak, Estadu no nasaun Timor-Leste presiza hela rekursu umanu iha tékniku.

Husu ba timoroan hotu ne’ebé hakarak sai ema tékniku ne’ebé di’ak, tenke dedika sira-nia aan no oferese sira-nia aan iha eskola tékniku. Prepara sira-nia aan sai ema tékniku ida ne’ebé profesionál atu bele kontribui ba dezenvolvimentu ne’ebé iha ita-nia rai.

Notísia relevante:Perfil Eskola Sekundária Iha Dili: Eskola Sekundária Jerál (ESG) Katólika Paulo VI-(VIII)

Jornalista  : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here