Xefe Departementu Estasionamentu Merkadu Taibesi, Avelina Xavier. Foto/Natalino Costa.

DILI, 11 setembru 2019 (TATOLI) – Xefe Departamentu Estasionamentu Merkadu Taibesi, Avelina Xavier, informa taxa estasionamentu merkadu Taibesi daudaun ne’e tun tanba viatura  ladún para iha laran.

“Tanba ne’e, bá oin sei servisu hamutuk ho Polísia Tránzitu atu haree hodi kontrola ba maluk ne’ebé lori karreta no motór tenke mai para iha laran. Tanba osan tarefa ne’e sira la’ós uza ba sira-nia aan maibé hatama ba Estadu”, Avelina dehan ba Tatoli iha Merkadu Taibesi, ohin.

Tanba ne’e nia husu ba maluk timoroan atu hatudu konsiénsia nune’e bele kontribui taxa ba Estadu.

Nia relata, iha inísiu estasionamentu ne’e funsiona (inaugura) iha 16 agostu 2017, loron ida bele kolleita taxa to’o $100, maibé agora, tanba balun lakohi mai para iha estasionamentu, tarefa ne’e tun kada loron dala ruma hetan de’it dólar 15.

Osan sira ne’e hafoin seguransa merkadu sira rekolla tiha, Xefe Departamentu submete kedan ba autoridade Munisípiu Dili nian.

Seguransa estasionamentu merkadu Taibesi, Aleixo Noronha Guterres, hatutan loron ida sira hatama osan husi tarefa estasionamentu ba karreta $10 no motór $5.

Tarefa ne’ebé maka aplika iha estasionamentu Taibesi mak ba motór oras ida sentavu 10, no karreta sentavu 25.

Iha fatin hanesan, Xefe Jestaun Merkadu Taibesi, Anibal de Jesus, hatutan iha ema balun ne’ebé maka to’o agora seidauk kumpre didi’ak ba regulamentu iha merkadu Taibesi, maibé jestaun merkadu obriga sira tenke kumpre.

“Loos katak iha ema barak mai lakohi para karreta iha estasionamentu laran tanba ta’uk selu tarefa, maibé ami fó hatete ba sira no lori sira tama mai para iha estasionamentu laran”, dehan Anibal de Jesus.

Notísia relevante : Rendimentu Estasionamentu La’o Di’ak

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here