Diretór Luta Hamutuk José Alves da Costa. Imajen/ Egas Cristovão

DILI, 29 novembru 2019 (TATOLI) – Sosiedade sivíl no akademista sira hatete atu garante ekonomia sustentavel iha futuru, hahú agora tenke investe iha setór produtivu sira.

Reitór Universidade da Paz (UNPAZ), Adolmando Soares Amaral, ko’alia kona-ba modelu ekonomia sustentavel tenke prepara kondisaun para depois bele garante ekonomia iha futuru.

“Atubele garante ne’e maka oinsá? Ita tenke investe maka’as iha setór produtivu sira, ezemplu, ita iha Timór ne’e setór privadu la halo investimentu, investimentu ne’ebé maka dudu ita-nia kreximentu ekonomia sa’e ne’e mai hosi Orsamentu Jerál Estadu (OJE), ne’ebé bainhira OJE ne’e nia montante boot entaun kreximentu ekonomia ne’e sa’e, enkuantu ki’ik, la sa’e”, afirma Reitór Adolmando Soares ba TATOLI iha nia kna’ar fatin Ai-Mutin, ohin.

Nia hatutan, parte seluk maka haree hosi setór produtivu sira seluk ne’ebé atu dudu mós kreximentu ekonomia sa’e, aléinde agrikultura mak turizmu. “Antes investe, primeiru, tenke prepara kondisaun depois haree ba investimentu iha setór turizmu ne’e rasik agora daudauk la’o oinsá ona, presiza sítiu turístiku sira ne’ebé maka halo sai prioridade para fó fali ita retornu ne’e”, dehan Adolmando.

Dirijente másimu UNPAZ ne’e subliña katak, durante ne’e setór produtivu la la’o, tanba área produtivu sira barak maka sei abandona, hanesan irrigasaun barak maka la utiliza, loloos tenke esplora para bele hasa’e produsaun, nune’e mós natar barak abandona tanba komunidade maioria simu subsídiu, nune’e muda tiha ona mentalidade hosi to’os-na’in no depende loos de’it ba subsídiu.

Iha parte seluk, Diretór Organizasaun Naun Govermentál (ONG) Luta Hamutuk, José Alves da Costa, salienta atu garante no atinje modelu ekonomia sustentavel tenke liuhusi peskiza.

“Presiza peskiza, ne’ebé ita lakohi para atu tau katak investe iha setór agríkola, maibé ikus mai halo tiha produsaun boot no ita rasik maka konsumu de’it, la esporta entaun rendimentu ekonomia ladún iha impaktu”, dehan José Alves da Costa.

Tanba ne’e maka tuir Luta Hamutuk nia haree katak modelu ekonomia sustentavel maka presiza tau importánsia ba setór produtivu sira hanesan agrikutura, indústria, no sira seluk maibé presiza identifika di’ak liután.

Kona-ba diversifikasaun ekonomia tenke mai ho konseitu ida di’ak no liuhusi peskiza, tanba ne’e maka persiza estabelese instituisaun independente ida para halo ida ne’e.

Iha loron Proklamasaun Independénsia Timor-Leste nian ba dala-44 iha 28 novembru 2019, Prezidente Repúblika, Francisco Guterres Lú Olo, afirma importánsia ba entidade hotu hodi diksute modelu ekonomia ba rai-laran ne’ebé sustentavel.

“Prezidente Repúblika apela ba polítiku sira, matenek-sira, sosiedade sivíl no parte hotu hodi diskute, halo peskiza no estudu hodi haree modelu  ekonomia ida ne’ebé sustentavel”, Xefe Estadu hatete iha nia diskursu iha komemorasaun loron importante Timor-Leste nian iha Palásiu Governu, kinta (28/11).

PR observa katak durante ne’e Timor-Leste hahú implementa modelu dezenvolvimentu ekonomia sosiál merkadu iha Oe-Cusse. Modelu dezenvolvimentu ne’e tenta tau hamutuk ekonomia merkadu ho responsabilidade sosiál, ne’ebé liberdade merkadu no justisa sosiál la’o hamutuk, tanen malu no la sátan malu hodi lori moris di’ak, isin no klamar ba sidadaun sira-nian.

“Ho modelu ida ne’e, Estadu harak promove polítika hodi tulun organiza di’ak merkadu nia funsionamentu no fó mós empoderamentu ba sosiedade tomak atu sidadaun hotu bele hetan dalan hodi partisipa no hetan benefísiu husi merkadu”, nia akresenta.

Notísia relevante : Xefe Estadu Afirma Importánsia Diskute Modelu Ekonomia Sustentável

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here