Prezidente Repúblika, Francisco Guterres Lú Olo, bainhira halo diskursu iha selebrasaun Loron Proklamasaun Independénsia 28 Novembru 1975 ba dala-44, iha Palásiu Governu, kinta (28/11). Imajen Tatoli/Egas Cristovão

DILI, 28 novembru 2019 (TATOLI) – Iha selebrasaun Loron Proklamasaun Independénsia 28 Novembru 1975 ba dala-44, Prezidente Repúblika (PR), Francisco Guterres Lú Olo, afirma importánsia ba entidade hotu hodi diskute modelu ekonomia ba rai-laran ne’ebé sustentável.

“Prezidente Repúblika apela ba polítiku-sira, matenek-sira, sosiedade sivíl no parte hotu hodi diskute, halo peskiza no estudu hodi haree modelu ida ne’ebé ita hili hodi lori ita ba ekonomia ida ne’ebé sustentável”, tenik Xefe Estadu iha ninia diskursu iha Palásiu Governu, kinta ne’e.

PR observa, durante ne’e Timor-Leste hahú implementa modelu dezenvolvimentu ekonomia-sosiál merkadu iha Oé-Cusse, ne’ebé modelu dezenvolvimentu ne’e tenta tau hamutuk ekonomia merkadu ho responsabilidade sosiál, ne’ebé liberdade merkadu no justisa sosiál la’o hamutuk, tanen malu no la sátan malu, hodi lori moris-di’ak, isin no klamar, ba sidadaun-sira nian.

“Ho modelu ida ne’e, Estadu hakarak promove polítika hodi tulun organiza di’ak merkadu ninia funsionamentu no fó mós empoderamentu ba sosiedade tomak atu sidadaun hotu bele hetan dalan hodi partisipa no hetan benefísiu husi merkadu”, nia akresenta.

Xefe Estadu rekoňese, Estadu iha papél mak oinsá garante estabilidade ba sasán nia folin hodi labele afeta ba sidadaun sira ho rendimentu kiik liu no Estadu mós la sai obstákulu ba sidadaun sira ne’ebé ho koñesimentu no abilidade rasik, iha inisiativa individu ka kooperativa hakarak rezolve problema rasik.

“Liuhusi modelu ida ne’e, polítika públika buka atu loke kampu trabalhu ne’ebé dignu no produtivu no garante konkorrénsia livre, respeitu ba propriedade privada no liberdade produsaun, liuhosi inisiativa privada, liuliu sira ne’ebé promove inovasaun no imajinasaun”, nia dehan.

Maski tuir nia, modelu ida ne’e sei iha faze inisiál no foin mak aplika iha Oé-Cusse hahú husi tinan 2015 liubá ho lideransa hosi Prezidente Autoridade dahuluk, Marí Alkatiri, nu’udar moos konseitór.

Xefe Estadu haree, Timor-Leste hakarak koko modelu dezenvolvimentu foun ida ne’ebé nia konsidera komplikadu tebes no involve investimentu ho kapitál boot no lori risku oioin, liuhosi indústria extrativa, liuliu indústria petrokímika iha Tasi Mane.

“Hanoin ne’ebé iha katak riku-soin iha rai okos iha tasi klean ne’ebá mak sei rezolve problema hotu iha sosiedade no nasaun nian, hanesan diversifika ekonomia no kria empregu”, nia mensiona.

Maski nune’e, nia nota, ho nível produtividade mão-de-obra sei afeta ba tipu no dimensaun investimentu ne’ebé Timor-Leste hakarak aumenta ba bebeik, liuliu iha área espesializadu sira ne’ebé sei mukit hela no sei presiza halo investimentu maka’as tebes iha tinan barak tuir mai.

“Bainhira ita hateke ba esperiénsia husi nasaun sira ne’ebé riku ho mina no gás no minerál, lisaun balun ne’ebé ita aprende mak ekonomia atu sai sustentável labele depende ba rekursu ida ne’ebé sei hotu. Ne’e atu dehan katak ita presiza investe makás liután iha ita-nia rekursu umanu hodi prepara didi’ak sira atu kaer rasik projetu boot  sira no komplikadu tebes”, nia haklaken.

PR Lú Olo sita katak durante tinan sanulu resin Governu sira ukun ho orsamentu ne’ebé boot no obriga foti osan barak liu husi Fundu Minarai, maibé dala barak ezekusaun orsamentál lato’o porsentu 90, ne’ebé hahú tinan 2005 to’o 2018 konsege transfere ona osan husi Fundu Minarai biliaun $10 resin hodi finansia despesa públika.

Nune’e, Xefe Estadu iha esperansa no hein nafatin atu haree polítika iha rai-laran ne’ebé tau atensaun maka’as liu ba empregu ne’ebé dignu no produtivu tuir Objetivu Dezenvolvimentu Sustentável númeru 8 kona-ba Trabalhu Dignu no Kreximentu Ekonómiku, tanba liuhosi empregu produtivu mak bele hamenus kiak no lori povu ba moris di’ak isin no klamar hanesan haktuir iha Konstituisaun Repúblika.

“Polítika públika tenke orienta ba hasa’e produsaun hodi habelar baze ba esportasaun la’ós favorese de’it konsumu selu ho osan fásil. Buat ne’ebé ita konsume loroloron kuaze porsentu 80 mai husi rai-li’ur, katak ita-nia osan halai sai husi Timor-Leste no monu iha ema seluk nia liman ne’ebé fa’an sasan no servisu mai ita. Situasaun ida ne’e labele kontinua bainhira ita hakarak duni hametin ita-nia soberania ekonómika”, nia salienta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here