Isár bandeira iha Munisípiu Aileu. Imajen: Antónia Gusmão

AILEU, 28 novembru 2019 (TATOLI)-Veteranu Munisípiu Aileu, Zacarias de Fátima “Mauputo” fó hanoin ba jerasaun foun sira liuliu iha Munisípiu Aileu atu bele banati tuir epiritu eroi sira nian, liuhusi partisipasaun no valorizasaun ba iha loron nasionál sira.

Veteranu Zacarias de Fátima “Mauputo”. Imajen: Rafy Belo

“Hanesan jerasaun foun liuhusi buat sira hanesan aprezenta estudante sira iha formatura, buat sira ne´e hotu ne´e esensiál tanba sira rasik akompaña, partisipa rasik hanesan loron hasa´e bandeira, rona esplikasaun liuhusi ida ne´e (diskursu) sira bele transforma sira-nia hanoin para aban bainrua bele banati tuir buat ne´ebé mak jerasaun tuan husik hela,” hateten Veteranu Z Mauputo, ba Ajénsia TATOLI, iha Kampu Tebe Bola, Sabraka Laran, Aileu vila, ohin.

Ho komemorasaun 28 novembru ba dala 44 ne´e, Veteranu Mauputo dehan katak  ne´e loron importante, loron ne´ebé hahú, ita-nia dirijente sira proklama indepedénsia unilaterál. Loron ida ne´e, ita presta omenajen durante tinan hirak nia laran maibé ohin diferente.

“Ohin lamenta uitoan, ohin loron  ida esensiál maibé partisipasaun komunidade ladun prinxe iha resintu ida ne´e. Ida ne´e mak ha´u ladun satisfeitu, ladun kontente maibé la´ós hela ho ida ne´e aban bainrua haree forma oinsá kuandu loron sira importante ita labele husik liu maibé tenke anima tanba loron ne´e fatór determinante  que hahú husi prinsípiu, liuhusi loron ida ne´e tenke fó valór, tantu ba mateneke, tantu ba povu atu hothotu tenke ho konsiénsia ida para loron sira importante, importante para komemora, festeja i di´ak liután ida ne´e,” nia espera.

Enkuantu, Administradór Munisípiu Aileu, João Tilman do Rêgo ba jornalista sira  hateten, sente kontente tanba ho envolvimentu ema hothotu, entidade hothotu munisípiu nian ba komemorasaun 28 novembru Proklamasaun Indepedénsia, ho objetivu katak ho pasadu atu lori ita ba oin liuliu iha prosesu dezenvolvimentu ita nian.

“Tanba ne´e, ita-nia korajen sira atu ko´alia, atu bele partisipa liuliu mak hametin unidade iha nível munisipál ninian hodi bele garantidu ba prosesu dezenvolvimentu nível munisipál nian iha Munisípiu Aileu,” friza autoridade másima Aileu ne´e.

Ba Jerasaun foun no komunidade sira, Administradór João Tilman do Rêgo hateten: “Konfiansa ne´ebé ita depozita ba sira (jerasaun foun), liuliu estudante sira atu bele estuda maka´as liután atu bele hatab ba forma ida di´ak iha futuru, liuliu iha kompetisaun siénsia no teknolojia”.

“Entaun, ho buat sira ne´e hotu, ita sempre fó motivasaun ba sira para oinsá atu bele dezempeña sira-nia funsaun no joven ida di´ak iha munisípiu ida ne´e. Ita hotu hatene tanba iha pasadu Aileu ne´e sai hanesan baixo (tuun) liu iha rekursu umanu maibé ho independénsia ida ne´e, ita hotu iha esperansa katak hohotu iha vontade, liuliu motivasaun mai husi inan-aman sira atu bele fó korajen ba sira para iha nível edukasaun sai fatór ida importante tebes,” nia haklaken.

Iha fatin hanesan, jerasaun foun no estudante universitáriu ida husi Munisípiu Aileu, Maria do Rosário Alves sente kontente ho komemorasaun loron proklamasaun indepedénsia, 28 novembru.

“Nu´udar estudante ita tenke estuda maka´as i haree problema sosiál sira ne´ebé mak iha komunidade rasik no problema sira ne´ebé mak munisípiu enfrenta,” dehan Vise-Koordenadór KEMA (Konsellu Estudante Munisípiu Aileu) ne´e.

Komemorasaun 28 novembru iha Munisípiu Aileu alende partisipa husi autoridade munisipál sira no veteranu sira, inklui mós estudante sira husi nível ensinu oioin.

Entretantu, testu proklamasaun independénsia lee husi Veteranu Zacarias de Fátima “Mauputo”.

Notísia relevante:Administradór Aileu Husu Komunidade Koopera Simu Dezenvolvimentu

Jornalista: Natalino Costa

Editór     : Rafy Belo

HAKEREK NO HATÁN

Please enter your comment!
Please enter your name here