Administadór Munisípiu Aileu, João Tilman do Rêgo bainhira prezide serimónia komemorasaun loron proklamasaun independénsia ba dala 44 iha Aileu. Imajen: Rafy Belo

AILEU, 28 novembru 2019 (TATOLI)-Administadór Munisípiu Aileu, João Tilman do Rêgo husu ba komunidade Munisipiu Aileu liuliu sira hosi Suku Bandudato, Laúsi no aldeia Sarii, postu administrativu Aileu vila hodi simu dezenvolvimentu iha munisipuu.

Pedidu ne’e Administradór hato’o relasiona ho planu Governu daualu nian atu estabelese sidade Universitária ne’ebé lokaliza iha Suku Bandodato, Laúsi no Aldeia Sarii.

“Ha’u husi ba ita hothotu Munisípiu Aileu espesialmente ba komunidade suku Bandudato, Laúsi no aldeia Sarii, autoridade lokál sira ha’u hato’o obrigado tanba ho ita boot sira-nia kontribuisaun maske dala ruma imi hirus maibé agradese ba imi tanba bele presta dadus hothotu relasaun ho programa governu nian ba sidade Universitária ne’ebé maka atu bele garantidu ba ita-nia oan sira nia futuru iha Munisípiu Aileu no bele atrai mós investimentu hosi Munisípiu seluk no nasionál,” hateten Administrádor ne’e liuhosi diskursu iha ámbitu komemorasaun loron proklamasaun Independénsia ba dala 44 ne’ebé hala’o iha Kampu tebe bola, Sabraka laran, ohin.

Lider másimu Aileu ne’e afirma, maske komunidade hosi suku rua no aldeia ida ne’e hirus maibé ikus mai bele presta dadus no besik ramata ona.

“Hein katak projetu sira tuir mai depende ba desizaun governu nian mai ita Munisípiu Aileu ha’u husu favór ida ba ita hotu hamutuk kolabora no simu programa ne’ebé maka fó benefisiu ba ita nia oan, beioan no jerasaun sira no ita Aileu sei sai riku no prontu atu ba halo kompetisaun em termos de rekursu umanu ho munisípiu sira seluk,” dehan João Tilman do Rêgo.

Hadomi Ambiente

Administradór ne’e mós husu tan katak komunidade Aileu tenke hadomi ambiente liuhosi soe foer iha fatin lisu.

“Ha’u husu komunidade atu hadomi ambiente, tenke sulan animál, labele husik la’o arbiru. Ba Komunidade iha merkadu soe fo´er iha fo´er fatin, ita maka iha dever atu kontribui ba rai ida ne’e nia moos, matak no nabelun tenke mai hosi ita ida-idak”.

Tan ne’e João Tilman do Rêgo apela ba autoridade lokál, lia-na´in, sidadaun baibain atu hamutuk hodi hateke ba kotuk hodi sai hanesan referénsia hodi hakat nafatin ba oin atu hadi´a munisípiu katak Aileu tenke prontu partisipa iha dezenvolvimentu maibé labele konta istória de’it, tanba Aileu sai mós sai kontribuisaun boot ba Timor-Leste, maibé labele hela ho ida ne’e más tenke hanoin buat foun liuliu ba dezenvolvimentu.

Notísia relevante:Planu Harii Sidade Universitária, Na´in Ba Rai: “Ami Lakohi Fó Tanba Ami-nia Moris”

Jornalista : Antónia Gusmão

Editór      : Rafy Belo

HAKEREK NO HATÁN

Please enter your comment!
Please enter your name here