Sekretáriu Estadu Ambiante, Demétrio do Amaral de Carvalho. Imajen TATOLI/Egas Cristovão

DILI, 25 novembru 2019 (TATOLI) – Atu konserva bee-matan hodi labele menus iha bailoron naruk, presiza sidadaun hotu nia konxiénsia hodi hakribit sunu no tesi ai arbiru.

“Se ita kuda bee, ita bele hetan bee, kuda bee ne’e husi kuda ai barak liután, labele sunu no tesi ai para depois ita-nia ai-laran sira bele kaer bee bainhira udan no bee bele tun ba rai-laran hodi nakfilak ba bee-matan sira. Kuandu ita-nia floresta iha kualidade, ambiente kualidade, bee la susar ba ita”, afirma Sekrétariu Estadu Ambiente (SEA), Demétrio do Amaral de Carvalho, ba TATOLI iha knaar fatin Bebora, ohin.

Sekretáriu Estadu dehan Timor-Leste hasoru mudansa klimátika no hetan ameasa maka’as ba menus bee.

“Ita tenke buka meiu atu kanaliza bee, tratamentu bee, transforma tasi-been ba bee-midar, konserva bee-matan sira no eduka ka sensabilizasaun ba komunidade sira respeita ambiente”, dehan.

Nune’e, nia dehan atu konserva floresta ne’e presiza nafatin mídia no entidade tomak nia papél atu halo kampaña hodi proteje no kuída meiu ambiente hodi ema hotu moris saudável.

Kauza mudansa klimátika kontribui maka’as husi país boboot ka industriál ne’ebé kontribui husi pre-industriál tanba prodús gás estufa hodi rezulta akesimentu globál (pemanasan global).

“Husi 2018 no 2019, ita konsege mobiliza fundu bilaterál sira no multilaterál husi país industriál millaun $42-resin hodi bele ajuda ita-nia atividade sira hodi hasa’e konxiénsia ema hotu atu hadomi ambiente”, katak.

Notísia relevante : Bee Moos iha Kapitál Dili Komesa Menus

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here