DILI 25 novembru 2019, (TATOLI)- Joven hosi Suku Aiseremou, Postu Administrativu Aileu Vila, Munisípiu Aileu dezde tuku neen dadersan prezensa ona iha Sede Suku Aiseremou to’o agora hodi hein Komisaun Organizadora (KO) ba fahe formuláriu ba vaga FALINTIL-Forsa Defeza Timor-Leste (F-FDTL).

Pedro Coelho (20). Imagén TATOLI/Antónia.

Pedro Coelho (20) hosi Aldeia Toho-laran, Suku Aiseremou, haktuir katak dezde dadersan tuku nen hein ona iha sede suku maibé kuaze tuku tolu lokra’ik ona KO seidauk mai fahe formuláriu.

“Ami rona katak ohin segunda 25 hosi komisaun Organizadora atu mai fahe formuláriu F-FDTL nian. Maibé to’o agora lokraik tan ona sira seidauk mai. Ami mai dadersan kedas, tanba formuláriu ne’e limitadu tebes no kada aldeia ida ema na’in lima de’it entaun tanba iha adeia ne’e joven barak no sei hadau malu maka ami mai sedu de’it tanba dala barak tarde lahetan, hateten Pedro Coelho ba TATOLI iha sede suku Aiseremou, Aileu, ohin.

Juventude ho idade 20 ne’e afirma katak, formuláriu ne’e limitadu tebes tan ne’e sei hadau malu entre joven sira.

“Formuláriu ne’e 25 de’it maibé joven iha suku ne’e barak tebes, ne’ebé kuandu hadau malu ona sempre hamosu problema,” konsidera Pedro.

Nune’e mós, Maria  Nelia Araújo Sarmento (27) sente triste tebes tanba formuláriu 25 de’it. Maibé haree fali ba joven barak.

“Hanesan joven hakarak tebes atu foti formuláriu no iha esperansa tebes, tan ne’e dadersan kedas ami mai ona, maibé ami hein to’o agora komisaun sira atu mai fahe seidauk mai. Mai maka lahetan tan ne’e sente triste tebes tanba formuláriu ne’e iha de’it 25 no joven ne’ebé hein liu tiha ona 25 ne’ebé depende ba sorte de’it,” konta Nélia.

Tuir observasaun TATOLI iha sede suku Aiseremou iha aredór sede suku joven feto no mane tuur hodi hein Komisaun Organizadora hodi hein fahe formuláriu.

Iha Suku Aiseremou, iha aldeia lima hanesan Aitohu-Laran, Erkuatum, Berkati no Besilau.

Notísia relevante:Foti Formuláriu Vaga F-FDTL, Juventude Rihun “Invade” Sede Suku

Jornalista: Antónia Gusmão

Editór.     : Rafy Belo

HAKEREK NO HATÁN

Please enter your comment!
Please enter your name here