Juventude sira entuziazmu lori dokumentu hodi hein hela ekipa fahe formuláriu F-FDTL iha Sede Suku Bairru-Pité. Imajen/Eugénio Pereira

DILI, 25 novembru 2019 (TATOLI)-Juventude; feto ho mane rihun hosi Suku Bairru-Pote, Motaél no Colmera, ohin, tuku 07:00 OTL, halo “invade” ba sede suku hirak ne’e hodi foti formuláriu vaga rekrutamentu ba forsa foun ne’ebé fahe direita hosi Komisaun Rekrutamentu Konjuntu Ministériu Defeza no Komandu FALINTIL-Forsa Defeza Timor-Leste (F-FDTL) no autoridade suku sira.

Notísia Relevante : Segunda, Komandu F-FDTL Loke Vaga ba Membru Foun 600

Tuir observasaun Ajénsia TATOLI iha sede suku hirak ne’e hatudu katak, kuaze aredór sede suku nian nakonu ho juventude; feto no mane ne’ebé iha entuziazmu boot  hakarak konkorre iha vaga ba forsa F-FDTL 2020 nian.

Xefe Suku Bairru-Pité, João da Costa Baptista Belo. Imajen/Eugénio Pereira

Xefe Suku Bairru-Pité, João da Costa Baptista Belo dehan, nia parte apresia Suku Bairru-Pité ho totál aldeia 26 ne’e juventude feto mane ho entuziazmu hadau malu hakarak kompete iha vaga rekrutamentu membru F-FDTL foun.

“Ita haree realidade iha ha’u nia suku rasik ho aldeia 26 ohin dadeer de’it ne’e too agora nakonu tebes ho juventude feto mane hodi mai hein formuláriu ne’ebé ita nia ekipa Komandu F-FDTL atu mai fahe,” dehan Xefe Suku João  da Costa Baptista Belo, hodi responde TATOLI.

Xefe suku ne’e husu ba Komisaun Organizasaun Ministériu Defeza no F-FDTL atu aumenta formuláriu rekrutamentu. Tanba kada suku fahe vaga 25 la sufisiente atu kobre Suku Bairru-Pité ho nia aldeia 26.

Xefe suku ne’e mós apela ba joven sira labele hadau malu formuláriu, tanba ekipa konjunta maka sei fahe direita no sei la akontese problema diskriminasaun.

Joventude balun komesa simu formulariu ba vaga F-FDTL 2020. Imajen/Eugénio Pereira

Iha fatin hanesan, Juventude Suku Bairru-Pité, Miguel de Costa dehan, nia parte ho kolega sira prepara ona dokumentu kompletu hodi kompete iha vaga ne’e.

Nia hateten, mezmu Komandu F-FDTL presiza de’it joven na’in 600 no fahe formuláriu rihun 11 signifika  kompetisaun ba rekrutamentu makas tebes.

“Hanesan joven ohin ami ho maluk joven sira mai forma iha Suku Bairru-Pité   bele kompete iha vaga ne’e, agora atu liu ka la liu ne’e depende ba ita idak-idak nia sorte,” tenik Miguel.

Ekipa Deside Aumenta Vaga 50 Ba Kada Suku

Prezidente Komisaun Organizadora Rekrutamentu F-FDTL 2020 nu’udar mós Xefe Estadu Maiór, Koronél Calisto Santos Coli “Coliati” no Vise Prezidente Komisaun Organizadora, Nuno de Carvalho dos Santos entrega dokumentu ba ekipa hodi fahe vaga formuláriu ba juventude sira iha Kuartél Jenerál F-FDTL Fatuhada, Dili. Imajen/Eugénio Pereira

Haree ba entuziazmu no ejijénsia iha terrenu boot tebe, Komisaun Rekrutamentu Konjuntu Ministériu Defeza no Komandu F-FDTL koloka ona ekipa konjunta hamutuk 13 hodi tuun direita ba kada Munisípiu 13 inklui Rejiaun Administrasaun Espesiál Oe-Cusse Ambenu (RAEOA) no Postu Administrativu 65 ho Suku 450 hodi fahe direita vaga formuláriu rekrutamentu hamutuk rihun 11.

Prezidente Komisaun Organizadora Rekrutamentu F-FDTL 2020 nu’udar mós Xefe Estadu Maiór, Koronél Calisto Santos Coli “Coliati” dehan, knaar no kompeténsia ekipa ba fahe de’it formuláriu no bainhira mosu kritika ruma hosi autoridade suku no juventude sira ekipa  bele halo  de’it esplikasaun bazeia ba orden servisu.

Coliati dehan, antes ne’e komisaun deside suku ida sei fahe de’it formuláriu 26, maibé hafoin tetu no analiza kle’an, ekipa deside ho fleksibilidade bele aumenta vaga formuláriu ba kada suku ida sei hetan 50.

“Se ita boot sira ba fahe formuláriu maka mosu duvida ruma relasiona ho númeru formuláriu ne’ebé fó sai ona katak, 25 formuláriu ba kada suku. Ida ne’e iha fleksibilidade ba ekipa atu hola desizaun. La signifika katak, ita mate formuláriu 25 ba kada suku, maibé ita sei aumenta tuir nesesidade suku ida atu hetan formuláriu too 50 sein duvida,” Coliati hateten.

Iha fatin hanesan, Vise Prezidente Komisaun Organizadora, Nuno de Carvalho dos Santos, apela ba joven sira ne’ebé la konsege hetan formuláriu iha kada suku bele ba foti direita iha Kuartél Jenerál F–FDTL Fatuhada, Dili, hodi prienxe depois tenke ba hatama tuir suku ne’ebé kandidatu sira moris ba.

“Ami apela ba joven kandidatu sira labele hadau malu formuláriu no halo problema, se ita boot sira la konsege hetan formuláriu, imi bele mai foti direita iha Komandu F-FDTL, Fatuhada, Dili,”  Nuno Carvalho hateten.

Nuno garante katak rekrutamentu ne’e sei la mosu diskriminasaun, tanba ekipa tun direita ba suku koordena ho autoridade hodi fahe direita formuláriu ba joven sira nia liman.

“Ita garante katak sei la iha liafuan  ida dehan diskriminasaun, tanba ne’e husu ba joven sira labele hadau malu no baku malu tanba formuláriu,” nia alerta.

Ekipa komisaun rekrutamentu husu ba autoridade suku no xefe aldeia sira atu koopera hodi fó susesu ba prosesu rekrutamentu hodi kontribui ba dezenvolvimentu rekursu umanu Komandu F-FDTL ohin no futuru.

Informasaun ikus iha tuku 14:30 OTL, juventude Suku Bairru-Pité, mantein iha Sede Suku hodi bele hetan formuláriu vaga nian. Maibé, tanba de’it formuláriu fahe ba kada suku 25, maka juventude balun kestiona hodi husu lori fila formuláriu ba Kuartél Jenerál F-FDTL.

Juventude sira argumenta katak, tuir loloos ekipa rekrutamentu labele determina formuláriu ba kada suku entre 25 to’o 50. Komisaun konjunta rekrutamentu tenke prepara formuláriu barak atu juventude sira hotu ne’ebé iha interese hakarak konkorre bele iha nia fleksibilidade. Importante mak rigor iha nia selesaun dokumentu no rigor iha prosedimentu rekrutamentu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here