Komisaun Rekrutamentu Konjuntu Ministériu Defeza no Komandu FALINTIL-Forsa Defeza Timor-Leste (F-FDTL) ne’ebé lidera hosi Tenente Koronél Constantino Moreira ho ekipa fó sai kritériu rekrutamentu ba membru F-FDTL foun 600 iha Kuartél Jenerál F-FDTL Fatuhada, Dili, tersa (19/11/2019). Imajen/Eugénio Pereira

DILI, 19 novembru 2019 (TATOLI)-Komisaun Rekrutamentu Konjuntu Ministériu Defeza no Komandu FALINTIL-Forsa Defeza Timor-Leste (F-FDTL), segunda (25/11/2019), sei ofisializa loke vaga rekrutamentu ba kandidatu membru F-FDTL foun hamutuk 600.

Komisaun rasik harii ona ekipa junta hamutuk 13 ne’ebé sei tuun direita ba kada Munisípiu 12 inklui Rejiaun Administrativu Espesiál Oe-Cusse Ambeno (RAEOA) no Postu Administrativu 65 no Suku 450 hodi fahe direita vaga rekrutamentu ho formuláriu hamutuk rihun 11.000, no kada suku ida, sei hetan de’it formuláriu 25.

Portavós Komisaun Rekrutamentu Konjunta, Tenente Koronél Constantino Moreira dehan, tinan ne’e prosesu rekrutamentu hala’o munisípiu hotu-hotu ho rigorozu hodi evita mosu problema familiarizmu.

“Ami halo ona preparasaun másimu hahú loron 25 Novembru 2019 sei hahú halo rekrutamentu ba povu Timor-Leste nia oan tomak feto no mane ba militár foun 600 iha tinan 2020,” informa Tanente Koronél Constantino Moreira, ohin, ba jornalista iha Kuartél Jenerál F-FDTL, Fatuhada, Dili.

Prosesu rekrutamentu ekipa sei haree hosi parte kondisaun fíziku no saúde ne’ebé di’ak ho prepara dokumentu prioridade hanesan; 1) Diploma Ensinu Sekundáriu hetan legalizasaun hosi  Ministériu Edukasaun. 2) Altura adekuadu mínimu ba feto metru 155 no ba mane metru 162. 3) Idade mínimu tinan 18 too  tinan 35. 4) presiza hetan karta deklarasaun hosi veteranu hosi kada munisípiu, 5) Deklarasaun Xefe Aldeia no Xefe Suku aprezenta ho Fixa Família Suku no Inan Aman nian. 6) Kartaun Eleitorál aplikante, 7) Kartaun Eleitorál Inan no Aman, 8) Sertidaun Batizmu aplikante no Inan Aman nian, 9) Sertidaun RDTL aplikante no Inan Aman nian, 10), Billete Identidade (BI) aplikante ho inan aman nian. 11) Sertidaun Kazamentu inan no aman no deklarasaun barlakeadu, 11) Fotografia  koloridu 3×4 tahan rua (2).

Kritériu seluk tan maka, kandidatu tropa sira presiza komportamentu di’ak la envolve iha kualkér grupu organizasaun no komete krime ruma no hetan komportamentu di’ak hosi Polisia.

Komisaun mós fó oportunidade fulan ida ba kandidatu sira atu prienxe formuláriu no prepara dokumentu kompletu hosi loron 3 too 6 janeiru 2020 komisaun sei tun ba kada suku hodi rekolla fila fali dokumentu hodi halo selesaun ba dokumentu hotu- hotu.

Ba dokumentu feto nian tau iha mapa kór modok ba mane no nian tau iha mapa kór mean.

Komisaun mós alerta ba kandidatu sira atu hatama dokumentu orijinál no labele hatama dokumentu ne’ebé falsifika ka fotokopia, tanba komisaun sei elimina.

“Bainhira kandidatu sira hatama dokumentu fotokopia ka falsifika no prenxe formuláriu fo’er ami sei elimina,” afirma Tenente Koronél Constantino.

Rekrutamentu ne’e hala’o bazeia rezolusaun governu ne’ebé hetan aprovasaun hosi Konsellu Ministru iha loron 23 Outubru 2019 ne’ebé aprezenta hosi  Ministru Defeza, Filomeno da Paixão de Jesus.

Jornalista : Eugénio Pereira

Editór       : Francisco Simões

6 KOMENTÁRIU

HAKEREK NO HATÁN

Please enter your comment!
Please enter your name here