Logotipu ESG 5 de Maio

DILI, 25 novembru 2019 (TATOLI) –Eskola Sekundária Jerál (ESG), 5 de Maio, Becora, iha tinan letivu foun sei limita númeru estudante ne´ebé sei inskreve iha estabelesimentu ensinu ne´e.

Diretór ESG 5 de Maio, Manuel Verdial fó razaun katak limitasaun ba númeru estudante foun ne´e tanba atu ajuda profesór sira atu kumpre sistema tolu ne´ebé konsagra iha eskola ne´e.

“Ha’u sei limita númeru estudante iha 2020 ho totál 300 de’it tanba hakarak ha’u-nia profesór sira tenke másimu domina sala-de-aula, hatene halo ordenamentu sala-de-aula no domina materia,” hateten Ezekutivu Manuel Verdial ba Ajénsia TATOLI iha nia kna´ar fatin, Becora, ohin.

Nia esplika, limitasaun ba estudante foun ne’e tanba hakarak tulun profesór sira atu hatene didi´ak kada alunu iha sala-de-aula no karakter estudante sira nian inklui movimentu iha sala-de-aulas. Maibé, husi sistema tolu ne’e, manorin na´in ne´e ezije maka´as liu mak abilidade profesor sira nian oinsá iha kapasidade atu domina materia ne’ebé atu fó ba estudante sira.

Nia mós kompromete katak iha 2020 nia lakohi haree no rona tan profesór sira entrega de’it livru manuál ba estudante sira depois profesór sira la iha sala-de-aula. Karakter sira hanesan ne’e mak sei prejudika kualidade estudante sira nian iha futuru. Ninia impaktu estudante mós sei la domina matéria 100%.

Profesór tenke iha sala-de-aula durante oras neen atu nune’e bele ajuda estudante sira iha prosesu aprendizajen. Karik materia ruma estudante sira la komprende fasil ba sira atu halo konfirmasaun no esplikasaun la´ós profesór ba tiha fatin seluk depois abandona tiha estudante sira.

“Kuandu eskola 5 de maio mak hetan de’it estudante 300 entaun kada sala de aulas ida bele iha ona 45 de’it. Ida ne’e sei ajuda liután profesór sira bele ezerse sira-nia dever no obrigasaun ho diak liután”.

Iha biban hanesan, Diretór ESG 5 de Maio, Manuel Verdial husu mós ba inan-aman sira atu kontinua apoiu planu ne’ebé mak eskola kria ona. Karik implementasaun ne’e realiza bele komprende tanba ida ne’e mak desizaun eskola nian ne’ebé tenke halo hodi nune’e bele ajuda di´ak liután manorin sira.

Notísia relevante:Perfil Eskola Ensinu Sekundária Iha Dili: ESG 5 de Maio Becora (II)

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here