Jardín Motaél, 12 de Novembro ne’ebé sei muda naran ba Jardín Sebastião Gomes Motaél. Imajen Tatoli/Cipriano Colo

DILI, 22 novembru 2019 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa atu muda naran Jardín 12 de Novembro Motael ba Sebastião Gomes, presiza konsulta didi’ak ho Komité 12 de Novembro (K12N) no familia, hafoin bele muda hodi lalika repete fali fallansu ne’ebé iha ona.

“Ha’u sente públiku barak mak kestiona, maibé ha’u husu pasiénsia tanba lori tempu, teknikamente ita rona ona husi ministru, ne’ebé tékniku sira presiza konsulta didi’ak ho kuidadu mak bele muda”, Diretór Jerál Turizmu afirma iha Hotel Timor, ohin.

Nia dehan, tékniku MTKI sira komesa hakbesik ona ba K12N, serbisu la’o daudauk hela no iha faze konsulta didi’ak tanba labele halo fallansu.

“Ita rekoñese ne’e fallansu tékniku oituan, ne’ebé presiza hadi’a para futuru, ita labele repete filafali tanba intensaun husi Ministériu Turizmu laiha intesaun politika, maibé serbisu profisionál hakarak promove sitíu turizmu, mas ami mós rekoñese ami-nia faillansu iha koordenasaun”, katak.

Diretór ne’e dehan atu muda naran Jardín 12 de Novembro presiza trata neneik, maibé sei iha rezultadu di’ak.

“Ha’u rasik husu halo konsulta ho familia no Komité 12 Novembru atu naran mós tenke hakerek didi’ak. Ne’ebé sei iha prosesu, iha tempu ida ita sei haree”, afirma.

Kona-ba orsamentu adisionál bainhira atu muda naran, Diretór Jerál Turizmu ne’e dehan orsamentu ne’e di’ak, mas presiza konsulta mak bele husu kompañia monta fali.

“Orsamentu laiha problema, problema ne’e letra tanba kompañia serbisu bazeia ba BOQ (Bill of Quantity) ne’e, Governu tenke aumenta osan husi aspetu tékniku ita rezolve” nia dehan.

Antes ne’e, Prezidente Komité 12 de Novembro (K12N), Gregório Saldanha sente triste ho promesa Governu ne’ebé atu muda naran Jardín 12 de Novembro ba Sebastião Gomes, maibé to’o oras ne’e seidauk realiza.

Iha loron 17 setembru, ekipa K12N hasoru malu ho Ministru Turizmu, Komérsiu no Indústria interinu, Fidelis Manuel Leite Magalhães, hodi hato’o preokupasaun Komité kona-ba naran ba Jardín Motael, nune’e, iha momentu ne’ebá Ministru Fidelis orienta ona ekipa téknika ministériu atu koordena ho kompañia ne’ebé kaer obra hodi bele muda naran ba Jardín “12 de Novembro Motael” ba “Sebastião Gomes”.

Jardín Motael ne’e konstrui husi empreza ALGIS Construction Engineering Lda, ho totál orsamentu $95.000 no durasaun konstrusaun fulan tolu.

Notísia relevante : MTKI Konsulta Ona Hodi Muda Naran Jardín Motaél ba Sebastião Gome

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here