Diretór Jerál Turizmu, José Filipe Dias Quintas. Imajen/Tatoli.

DILI, 25 setembru 2019 (TATOLI) – Ministériu Turizmu, Komérsiu no Indústria (MTKI), konsulta ona ho família saudozu Sebastião Gomes no kompañia hodi muda naran Jardín 12 Novembru Motaél ba Sebastião Gomes.

“Hafoin simu orientasaun, ami-nia ekipa tékniku hala’o ona koordenasaun ho kompañia atubele halo mudansa naran jardín 12 de Novembru ba Sebastião Gomes”, Diretór Jerál Ministériu Turizmu, José Filipe Quintas, ba Tatoli iha Sentru Konvesaun Dili, ohin.

José Quintas informa MTKI konsulta ona família saudozu Sebastião Gomes atu hatene loloos aseitasaun família no naran kompletu husi saudozu nian.

“Ita konsulta ona saudozu nia família no Komité 12 Novembru atubele tau naran saudozu nia ne’e labele sala fali”, katak.

José Quintas dehan simu ona orietasaun husi Ministru MTKI interinu, Fidelis Manuel Leite Magalhães, hodi hahú halo konsulta téknika no dezeñu, halo konstrusaun foun hodi muda naran.

Kona-ba orsamentu adisionál, José Quintas, adianta ne’e kestaun tékniku ne’ebé entrega ona ba diresaun planeamentu turizmu mak sei koordena ho kompañia atu konstrui.

Prezidente Komité 12 Novembru, Grigório Saldanha, agradese ba Governu tanba ho fuan boot rona preokupasaun komité nian hodi muda naran jardín 12 de Novembru Motaél ba Sebastião Gomes.

Konstrusaun ba Jardín Motaél ne’e husi empreza ALGIS Engineering Costruction Lda, ho totál orsamentu 95.000, no durasaun ba konstrusaun durante fulan tolu.

Notísia relevante :Governu Deside Muda Naran Jardín “12 de Novembro Motael” ba “Sebastião Gomes”

Jornalista       : Florencio Miranda Ximenes

Editora           : Maria Auxiliadora

HAKEREK NO HATÁN

Please enter your comment!
Please enter your name here