Logotipu UNITAL.

DILI, 21 novembro 2019 (TATOLI)-Universidade Oriental Timor Lorosa´e (UNITAL) haruka dosente na´in 58 kontinua sira-nia estudu iha estranjeiru, liuliu Indonézia no Portugal hodi hasa´e sira-nia kualidade akadémika.

Reitor Unital, Florindo Pereira. Imajen Egas Cristovão

“Instituisaun fó oportunidade ba dosente sira ne’e tanba polítika instituisaun nian atu lori UNITAL sai nu’udar universidade ida ne’ebé ba futuru bele kompete di´ak liután ho instituisaun ensinu superiór sira seluk,” haktuir Reitór UNITAL, Florindo Pereira ba Ajénsia TATOLI, iha nia kna´ar fatin, Kampus UNITAL, Becora, Dili, kinta (21/11/2019).

Dosente na´in 58, tuir reitór UNITAL ne´e katak na´in 10 foti doutoramentu 48 kontinua foti kursu mestradu. Maske nune´e, entre dosente sira ne´e na´in neen fila ona Timor-Leste (TL) kontinua reforsa instituisaun. Sira ne’ebé mak hetan oporrunidade ne’e la´ós haree de’it matenek maibe sira-nia disiplina.

“Dezde ha’u asume knaar ida ne’e (reitór) ha’u halo identifikasaun ba dosente sira ne’ebe mak iha kualidade ita fó oportunidade hodi bele kompleta tan sira-nia kursu,” haktuir Reitór Florindo Pereira.

Tuir akadémiku ne´e katak dosente sira ne’ebé seidauk fila ne’e tanba foin mak iha prosesu peskiza no balun iha preparasaun teze. “Agora iha Portugal hamutuk na’in neen, fila hotu ona no sira ne’ebé iha Indonézia mak sei kontinua hela. Ne’eduni, sira fila hotu ona instituisaun sei garante di´ak liután kualidade universidade nian.

Reitór ensinu superiór privada ne´e relata katak dosente permanente inklui parte tempu ne’ebé instituisaun iha agora daudaun besik ema na´in 201.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here