Diretór Jerál Floresta, Ministériu Agrikultura no Peska (MAP), Raimundo Mau. Imajen/Mídia MAP.

DILI, 21 novembru 2019 (TATOLI) – Diretór Jerál Floresta Ministériu Agrikultura no Peska (MAP), Raimundo Mau, informa seidauk halo levantamentu ba animál hira maka mate iha Parke Nasionál Nino Konis Santana iha munisípiu Lautem, maibé bazeia ba informasaun katak rusa kuaze 10 maka mate tanba kondisaun fízika ne’ebé la aguenta ho rai nia manas.

“Ami laiha levantamentu dadus ba rusa hira maka mate iha Jaco, maibé mate iha númeru ki’ik, informasaun ne’ebé ami hetan rusa ne’ebé mate la to’o sanulu. Rusa ki’ik balu tanba kondisaun fízika la aguenta, entaun kuandu tama ba iha basia (fatin tau bee) labele sai filafali no mate de’it iha laran”, hateten Diretór Jerál ba TATOLI iha MAP, ohin.

Raimundo Mau haktuir katak iha fulan-outubru, novembru ne’e bailoron naruk tebes, no bee-maran, ai-tahan sira ne’ebé balada sira atu han maran hotu, hanesan iha Jaco, rusa iha ne’ebá bee midar laiha, entaun regularmente MAP apoia bee hosi Tutuala ba iha Jaco no tinan ida aloka osan rihun $2 para atu fornese bee midar hosi Tutuala ba Jaco.

“Ne’ebé semana rua liubá ami foin lori tan litru rihun ida ba enxe iha basia ne’ebé maka prepara iha ne’ebá”, katak.

Raimundo dehan, rusa balu mate duni, más ne’e prosesu naturál katak rusa sira ne’ebé ki’ikoan tanba la aguenta ho manas demais, no mós sira ne’ebé maka fízikamente fraku nanis ona, entaun temperatura ne’ebé maka’as tebes no ladún asesu ba bee, no laiha ai-tahan matak para han, afeta ba nutrisaun isin lolon, no kauza balu mate.

Kona-ba karau sira ne’ebé mate, Diretór Jerál ne’e klarifika katak, karau sira ne’e iha lagoa Iralalaru ninian, tanba karau Timór sempre hoban-aan iha bee debu, más iha fulan-outubru, novembru maran demais entaun debu sira ne’e mós maran, no tau sira ne’ebé sei bokon, karau koko tama katak sei iha bee entaun karau belit tiha iha debu ne’e no la konsege atu sai filafali.

Raimundo Mau esklarese katak, tuir informasaun hosi komunidade iha área ne’ebá, iha balada barak maka mate no ne’e loos duni, maibé laiha númeru ida ne’ebé maka boot no impaktu hosi bailoron naruk.

Medida ne’ebé Diresaun Jerál Floresta halo maka fornese bee, más ba iha balada maus sira umakain ida-idak maka tenke haree ninia balada kuandu debu ne’ebé belit demais sira kontrola sira-nia balada.

Kona-ba fornesimentu bee-midar ba de’it rusa iha Jaco para salva sira hosi outubru, novembru to’o inísiu dezembru.

“Ami tau ona orsamentu rihun $10 iha 2020 para instala tan basia kaptura udan-been to’o litru rihun lima iha Jaco para tempu udan-been mai para hela no bailoron bele utiliza de’it bee ne’e”, katak Raimundo.

Notísia relevante : Rai-Manas no Bee Laiha Halo Animál Mate iha Parke Nino Konis Santana

Jornalista : Antónia Gusmão

Editora : Maria Auxiliadora

1 KOMENTÁRIU

  1. Diretor Jeral Floresta durante ne’e halo ona saida mak kolia hanesan ema neon laek ne’e? ita boot nunka kria ekipa ida hodi tun diretamente kondisaun iha JAco ne’eba maibe mai koalia hanesan ema matandook incapasidade haree buka alternativu seluk. Laos tur halo aisasik

HAKEREK NO HATÁN

Please enter your comment!
Please enter your name here