Ministru Agrikultura no Peskas Joaquim José Gusmão dos Reis Martins. Imajen/Antonio Goncalves.

DILI,  20 novembru 2019 (TATOLI) – Ministru Agrikultura no Peska (MAP), Joaquim José Gusmão dos Reis Martins, hateten rai-manas no bee laiha, halo animál balu mate iha Parke Nasionál Nino Konis Santana.

“Ami-nia ekipa tun bá baze, saida maka akontese iha ne’ebá tanba rai manas kleur, bee laiha. Ne’e maka MAP munisípiu nian ami fó ona orientasaun para lori bee ba enxe tanba iha ne’ebá iha tanke bee nian. Iha ne’ebá animál hanesan; rusa no seluk, bee ne’e enxe periódikamente iha ne’ebá no ami sempre dehan funsionáriu iha munisípiu para haree parke ne’e”, hateten Ministru Joaquim ba TATOLI iha Palásiu Governu, ohin.

Joaquim salienta, animál sira ne’ebé mate ona MAP identifika no rejista hamutuk, maibé importante liu ba sira ne’ebé moris fó bee ne’ebé sufisiente, para ultrapasa tiha tempu bee-maran to’o novembru remata udan mai ne’e di’ak ona.

“Atu halo intervensaun antes animál mate tan maka ami hadi’a filafali tanke rezerva rua ne’ebé maka kleur ona, ne’ebé tinan oin iha osan uitoan halo tiha reabilitasaun para enxe bee, nune’e to’o ona iha fulan-setembru, outubru hahú enxe bee. Fasilidade maka mukit tebetebes”, afirma Joaquim.

Ministru relata, to’o agora seidauk simu dadus katak animál hira maka mate iha Parke Nasionál Nino Konis Santana, maibé sei kontaktu ho funsionáriu MAP nian iha Lautem hodi oferese dadus.

Notísia relevante : Presiza Estabelese Armazein Bee iha Illa Jaco

Jornalista: Antónia Gusmão

Editora : Maria Auxiliadora

1 KOMENTÁRIU

  1. Ministru deteka ona animal mate tamba bai-loron ka rai manas, iha komunikasaun kalae ho entidade kompetente nebe toma kontak ba Klima nebe’e ohin loron akontese. Hau la komprende deit, to’o ohin loron laiha institutuisaun hosi governu maka isplika ba publiku ,,konaba bailoron naruk no manas ne’e too bainhira no bainhira maka udan tau rai los…nudar nasaun soberanu ida tenki iha nia esplikasaun ruma..mas hau la hare liu iha Timor-Leste ne’e..karik hau maka lahatene???

HAKEREK NO HATÁN

Please enter your comment!
Please enter your name here