Diretór Jerál Turizmu, José Filipe Dias Quintas. Imajen/Tatoli.

DILI, 21 novembru 2019 (TATOLI) – Timor-Leste liuhusi liña ministeriál hahú define produtu lokál ne’ebé iha ona sertifikasaun nasionál no internasionál hanesan Kafé, Kamii, Mina-Nuu Virjen no Masin Lokál hodi promove iha espozisaun Dubai-Uni Emirat Arab 2020.

Nune’e Diretór Jerál Turizmu Ministériu Turizmu, Komérsiu no Indústria (NTKI), José Filipe Dias Quintas, dehan aban (sesta, 22/11), sei iha enkontru atu define produtu ne’ebé atu lori bá hanesan Kafé tanba iha padraun kualidade ida ne’ebé di’ak, no Kamii iha kompañia balun mós iha ona padronizasaun husi Amérika no Mina-Nuu virjen husi Lospalos mós iha sertifikasaun balun husi Austrália no sei haree mós Bani-been.

“Ami rona ona katak Masin lokál mós iha ona sertifikadu husi Singapura nian, ne’e mak ita sei promove”, Jose Quintas ba Ajénsia TATOLI iha kna’ar fatin Faról, ohin,

Daudaun, MTKI kontinua halo koordenasaun ho Ministériu Agrikultura no Peska, TradeInvest no Sekretáriu Estadu Kooperativa no parseiru nasionál no internasionál atu diskute produtu Timor-Leste ba promove iha espozisaun Dubai 2020.

Diretór Jerál Turizmu ne’e dehan kritériu lori produtu lokál ne’e tenke iha sertifikasaun no haree ba kualidade kompozisaun liuliu matéria saida mak uza iha produtu ne’e rasik.  Nune’e, ba sertifikasaun MTKI serbisu hamutuk ho parte komérsiu hodi prepara sertifikadu orijinál ba produtu sira ne’e.

Iha Expo Dubai ne’e, Timor-Leste aproveita mós fa’an nia produtu lokál hanesan artezanatu tanba rejistu ona no mós promove ai-han lokál sira.

MTKI mós hahú enkontru ho setór privadu sira atu presiza aproveita Expo Dubai ne’e hodi promove turizmu, indústria, komérsiu no investimentu inklui seluk tan.

Nia dehan, daudaun MTKI sei halo selesaun ba artezanatu no ai-han lokál iha Timór laran tomak tanba sasán ne’ebé lori tenke iha kualidade no prienxe rekizitu. “Ita selesiona tuir padraun atu reprezenta Timor-Leste, ita hakarak lori produtu ida ne’ebé kualidade”, afirma.

Programa lubuk ida mak Timor-Leste sei aprezenta iha Expo Dubai durante fulan neen. Ne’ebé presiza prepara didi’ak atu konklui expo ne’e bele hatene benefísiu saida mak Timor-Leste hetan.

“Ita sei foka liu ba promosaun, ne’ebé ita sei organiza ho komisaun organizadora atu realiza forum negósiu ne’ebé ami sei koordena ho TradeInvest sira para promove Timor-Leste liuhusi forum no atividade oin-oin”, dehan nia.

Iha 29 to’o 30 novembru ne’e, Timor-Leste partisipa tan International Participation Meeting (IPM) iha  Dubai, objetivu enkontru  ida ne’e atu haree progresu preparasaun no serbisu kada nasaun.

“Ita sei haree no aprezenta ita-nia pavillaun, dezeñu to’o ona iha ne’ebé? Bainhira  mak konklui  no saida mak Timor-Leste sei aprezenta durante Expo Dubai no produtu no programa saida mak ita sei lori, no buat lubuk ida mak ita sei diskute liuliu asuntu tékniku nia, vistu no sasán  atu lori bá iha Dubai ho nia mekanizmu sira”, katak.

Enkontru internasionál ne’e sei partisipa direta husi Autoridade Nasionál Expo Dubai, Francisco Kalbuadi Lay no koordenadór jerál, sesaun dezeñu no programa hodi atualiza preparasaun Timor-Leste ba Komisaun Organizadora Expo Dubai 2020 nian.

“Parese iha tinan oin mak ita sei hatene didi’ak produtu saida mak ita sei lori bá no produtu saida de’it mak diretamente bele fa’an iha ne’ebá no setór privadu ne’ebé reprezenta lori artezanatu no ai-han lokál”, afirma.

Koordenadór Jerál Expo Dubai ne’e dehan MTKI hato’o ona ba kada ministériu katak produtu ne’ebé Timor-Leste atu lori ne’e la’ós kualidade de’it, maibé mós iha nia kuantidade atu nasaun ka emprezáriu balun iha interese bele esporta.

Antes ne’e, Autoridade Nasionál Timor-Leste ba Expo Dubai, Francisco Kalbuadi Lay, halo ona vizita ida bá iha Dubai hodi haree sítiu ne’ebé atu realiza expo ne’e.

Iha vizita ne’e, nia dehan Governu Dubai apoia fatin no asisténsia ba Governu Timor-Leste atu partisipa expo ne’e atu promove aan ba mundu.

“Ita agradese ba sira (Governu Dubai) tanba fatin ne’e sira oferese gratuita ba ita no sira mós fó asisténsia mai ita durante ita organiza espozisaun iha Dubai”, nia hatete.

Espozisaun mundiál ne’e, sei partisipa kuaze nasaun 192, ne’ebé sei selebra iha Dubai-Uni Emirat Arab, hahú iha 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : Governu Prevee Millaun $2 ba Expo Dubai

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here