Expo Dubai 2020. Imajen/Google.

DILI, 21 novembru 2019 (TATOLI) – Diretór Jerál Turizmu Ministériu Turizmu, Komérsiu no Indústria, José Filipe Dias Quintas, informa Governu prevee orsamentu ba espozisaun Dubai liuhusi Orsamentu Jerál Estadu (OJE) 2020 ho montante millaun $2.

“Orsamentu ba Expo Dubai ne’e prevee millaun $2,9, ami halo revizaun ba millaun $2,1 mais sei redús fali tanba ita hatene OJE 2020 Governu iha ona informasaun atu redús, ne’ebé sei redús tan bele to’o millaun $2 hanesan ne’e”, Diretór Jerál Turizmu ba TATOLI, iha knaar fatin Faról, ohin.

José Quintas friza Expo Dubai 2020 ne’e diferente uitoan ho Expo Milan (Itália) 2015, ne’ebé expo ne’e sei iha atividade barak, presiza orsamentu boot atu halo preparasaun di’ak.

“Orsamentu ne’e sei foka liu ba organiza buat lubuk ida, promosaun, iha viajen tanba ita-nia pavillaun ne’e mós boot ne’ebé staff mós tenke aumenta to’o 30 no sei uza mekanizmu rotativa ka sei troka malu, la’ós fulan neen tomak iha ne’ebá”, katak.

Governu liuhusi MTKI presiza timoroan sira mak iha ne’ebá atu hetan mós esperiénsia husi expo ne’e, liuliu joven sira ne’ebé ho abilidade di’ak iha turizmu no investimentu.

“Orsamentu balun ita sei aloka ba lojístiku liuliu ba sasán ne’ebé ita lori atu ba promove iha Expo Dubai ne’e no ita sei aloka ba mós saláriu no vensimentu ba staff no komisaun organizadora sira”, katak.

Timor-Leste hetan priviléjiu di’ak tebes tanba Governu Dubai apoia fatin gratuita no sei fó kontentór ida gratuita ne’ebé bele aproveita lori produtu sira ne’ebé selesionadu ona.

Konsuladu Jerál Timor-Leste iha Beirut-Lebanon, Joseph Issa, hanesan mós komisáriu jerál Timor-Leste nian ba Expo Dubai 2020 ne’e, apoia Timor-Leste ho másima hodi prepara pesoál na’in-rua atu ajuda Timor-Leste, ne’ebé presiza fó insentivu husi Beirut mai Dubai.

“Ita tenke prepara orsamentu ida para selu sira ne’e hanesan voluntáriu mai ajuda Timór, ne’e ita fasilita sira-nia osan tanba iha loron 29 to’o 30 mós sira mai partisipa International  Participation Meeting (IPM) iha  Dubai hodi  apoia delegasaun Timor-Leste”, dehan nia.

Nia hatutan orsamentu ne’e prevee iha OJE 2020, para iha tinan oin halo preparasaun no mobilizasaun sasán bá Dubai atu bá haree pavillaun ne’e.

“Ita hahú aloka ona orsamentu rihun $100 atu halo preparasaun, liuliu sekretariadu, selu staff sira para komesa serbisu no orsamentu ba dezlokasaun enkontru sira ne’e ita komesa prevee iha OJE 2020 para tinan 2020 ba ona programa expo nian”, katak.

Nia dehan, partisipasaun Timor-Leste to’o fulan neen, ne’ebé prepara pesoál sira atu atende vizitante sira tanba husu setór turizmu, investimentu, agrikultura, istória no kultura.

Aleinde ne’e, Timor-Leste mós sei organizasaun forum negósiu liuhusi TradeInvest iha área oin-oin no ba loron internasionál dame, sei iha panelista husi José Ramos Horta no figura balun hanesan Kay Rala Xanana Gusmão atu fahe esperiénsia Timor-Leste ho Indonézia liuliu rekonsiliasaun, atu sai hanesan referénsia ba nasaun sira seluk.

Espozisaun mundiál ne’e, sei partisipa kuaze nasaun 192, ne’ebé sei selebra iha Dubai- Uni Emirat Arab, hahú iha loron 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : Governu sei Selesiona Grupu Kultura no Artezanatu Partisipa Expo Dubai 2020

Jornalista : Florencio Miranda Ximenes

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here