Asesór prinsipál MTKI, Jacinto Rigoberto. Imajen/TATOLI

DILI, 19 outubru (TATOLI) – Governu liuhosi Ministériu, Turizmu, Komérsiu no Indústria (MTKI) sei halo selesaun ba grupu artezantu, kultura no produtu lokál, hodi bá partisipa iha espozisaun Dubai iha 2020.

“Grupu sira ne’ebé hetan audiénsia ho ekipa linã ministériál ne’e sei rejista hotu. Ita sei hala’o selesaun ida atu hili reprezentante de’it mak reprezenta Timor-Leste iha eventu expo Dubai Iha tinan 2020″, Asesór Prinsipál MTKI, Jacinto Rigoberto, hatete iha enserramentu feira loraik iha jadín B. J. Habibie, ohin.

Jacinto Rigoberto dehan daudaun ne’e, MTKI ho ekipa ministeriál esforsu hela atu organiza didi’ak Timor-Leste nia partisipasaun iha eventu mundiál ne’e.

“Ita haree eventu besik ona tanba tinan oin (2020) ne’ebé ita presiza organiza no prepara didi’ak hafoin ita promove indentidade soberania ba mundu”, katak.

Timor-Leste sei hatudu no promove identidade iha expo Dubai 2020, nu’udar nasaun soberana no joven liu iha ASEAN no Pasífiku, ne’ebé país barak mak seidauk koñese.

Asesor Prinsipál MTKI ne’e salienta identidade Timor-Leste nian ne’ebé sei promove maka produtu orgániku agríkola hanesan kafé no kamii, área turizmu, mina Timór, dansa kultura no artezanatu.

Antes ne’e, Autoridade Nasionál Timor-Leste ba Expo Dubai, Francisco Kalbuadi Lay, halo ona vizita ida bá Dubai hodi haree fatin ne’ebé sei realiza espozisaun ne’e.

Iha vizita ne’e, Governu Dubai apoia fatin no fó asisténsia ba Governu Timor-Leste atu partisipa expo atu promove aan ba mundu.

Expo Dubai 2020, sei dada turista sira no dada investidór sira atu mai investe iha nasaun ne’e.

Espozisaun ne’e sei akontese iha Dubai Uni Emirat Arab, hahú 20 outubru 2020 durante fulan-neen, enkuantu área ba expo ne’e kuaze etare 438 (1.080 ac) iha Dubai Exhibition Center, nune’e, partisipasaun ba expo kuaze nasaun 192 inklui Timor-Leste.

Notísia relevante : TL Prontu Partisipa Iha Expo Dubai Promove Produtu ba Mundu

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here