Promotora ba foinsa’e Timor-Leste, Maria Vitória. Imajen António Gonçalves

DILI, 20 novembru 2019 (TATOLI)-Promotora Foinsa´e nomeidu husi UNICEF, Maria Vitoria Borges “Marvi” haktuir, iha nia tempu labarik nian la fasil hanesan labarik sira ohin loron tanba moris iha lona okos ba sá hahú hosi tinan 2006 to’o 2009 nu´udar refujiadu, hasoru dezafiu oioin, liuhosi terus no susar barak.

Nesesidade bázika tebtebes mós susar atu hetan, liuliu atu goza vida halimar hanesan labarik sira agora goza ne’e lae liu tanba ekonomia uma laran mínimu tebes maibé agradese tebes ba inan-aman tanba sempre apoia, sempre buka oinsá para bele ultrapasa moris difísil ne’e.

Moris nu´udar refujiadu iha lona nia okos UNICEF sempre ajuda sira kompleta nesesidade balun.

Notísia relevante:UNICEF Nomea Marvi Sai Promotora Foinsa’e

“Entaun ami hela iha lona nia okos, ema barak no labarik barak iha momentu ne’ebá, nune’e Unicef rasik maka tau-matan ba ami ki’ik oan sira, hosi nesesidade ki’ik hotu, orsamentu uitoan iha nunka atu uza hodi sosa sasán halimar ruma ka telefone ruma ne’ebé ita hakarak. Ha´u-nia tempu labarik la fasil hanesan labarik sira agora ne’e,” haktuir Marvi bainhira sai panelista, iha ámbitu komemorasaun Loron Mundiál Labarik, iha Timor Plaza, kuarta ne´e.

“Maibé ho forsa no esforsu tomak hosi hau-nia inan-aman, ami la falta hahan ba loron ida, tanba ne’e hau agradese no sorte tebes tanba hetan família ne’ebé sempre akompaña no tau-matan ba ha´u hosi ki’ik to’o agora. Sakrifisiu ne’ebé ha´u hasoru, hau foin sa´e eskada rua, seidauk to’o iha leten, tuir mai sei luta tan,” Marvi haktuir ho neon susar hodi kompromete.

Relasiona ho komemorasaun Loron Mundíal ba Labarik, Promotora Foinsa´e ne´e fiar katak labarik sira iha Timor-Leste bele goja direitu sira nian ho di’ak hodi assesu ba elementu nune’e mós evita forma uma-kain sedu.

Fiar katak labarik sira iha Timor-Leste bele goja direitu ba asesu iha edukasaun ne’ebé kualidade, hetan protesaun no asesu ba elementu hotu nune’e bele asegura sira atinje sira-nia mehi no aprende ho prosperiedade.

Vensedora The Voice Portugal ne´e reprezenta labarik timoroan tomak husu atu Governu no Estadu kontinua tau-matan ba labarik sira hodi hetan direitu báziku.

“Ita ezije labarik sira-nia direitu báziku, Governu no Estadu Timor-Leste presiza apoiu nafatin labarik Timor-Leste tomak hodi asesu ba direitu báziku, nune’e labarik sira bele asesu ba eskola, bele asesu ba saúde no sente seguru iha uma no eskola sira. Husu mós ba inan sira atu bele fó susuben inan sira nian ba bebé sira. Uainhira sira halo fulan ne’en tenke fornese hahán ne’ebé nutritivu ba labarik sira,” Marvi haklaken.

Nu´udar foinsa´e ida, Marvi fó hanoin ba maluk foinsa´e timoroan seluk katak sai inan ho idade ne’ebé nurak la fasil.

“Sai inan ne’e la fasil, maske hau seidauk sente sai inan maibé ha´u bele komprende no sente liu hosi ha´u-nia mama. Entaun hanoin ba ida ne’e no hanoin ba futuru lai, se prontu ona laiha buat ida, labele foti desizaun ida ne’ebé uainhira iha situasaun la aproriada hodi estraga fali vida seluk. Signifika, prevene mortalidade ba bebé liuhosi isin-rua sedu,” Marvi hateten.

Nia reforsa, labarik sira maka prezente no jerasaun foun ne’ebé nasaun ne’e presiza nune’e nia motiva atu labarik, foinsa´e sira labele ta´uk atu koko oportunidade ne’ebé iha.

“Ita maka prezente no futuru ba nasaun doben Timor-Leste. Se la’ós ita, ita bele halo mudansa, bele lori grasa mudansa ita bele hahú agora. Se la’ós ita, se tan no bainhira? Fiar ba ita- nia forsa no haloos ita-nia frakeza. Se ita ta´uk de’it ba ita-nia frakeza susar ba ita atu la’o ba oin. Koko uluk lai, hafoin ita hatene, labele tauk atu koko, la susar no la sala kuandu ita koko,” Marvi enkoraja.

Enkuantu, Reprezentante Organizasaun Fundu Nasaun Unida ba Labarik (UNICEF, sigla portugés), iha Timor-Leste (TL), Valerie Taton hateten, estabelesimentu UNICEF nian mak haree labarik tomak nia direitu, iha área saúde, edukasaun no seluk tan ho igualidade no ekuidade.

Valeria mós akresenta programa “Juventude, Parlamentu foinsa´e nu´udar rezultadu susesu ida hosi kooperasaun entre  UNICEF ho Governu TL. “Ida ne’e hanesan  plataforma ida ba joven sira atu bele hato’o sira-nia  lian ho rezultadu pozitivu ida ne’ebé UNICEF halo hamutuk ho governu Timor-Leste” nia konsidera.

Entretantu, tema ba komemorasaun Loron Mundiál Labarik iha TL mak “ Ha´u-nia Lian, Ha´u-nia Direitu”.

UNICEF-KNDL Inaugura Iluminasaun Lampu Azul Iha Cristo Rei

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here