Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu. Imajen/Tatoli

DILI, 20 novembru 2019 (TATOLI) – Ministru Estadu Koordenadór no Asuntu Ekonómiku Interinu, Fidelis Manuel Leite Magalhães hamutuk ho TradeInvest aprezenta Proposta Akordu Espesiál Investimentu entre Estadu Timor-Leste no Pelican Paradise Group. Lda.

Ministru Estadu Prezidénsia Konsellu Ministru, Hermenegildo Augusto Cabral Pereira, hateten ezekutivu sira rona aprezentasaun kona-ba projetu Pelican Paradise, hanesan projetu boot ida-ne’ebé dezenvolve kle’ur ona to’o ohin loron, nune’e bele entende didi’ak to’o ona pontu ne’ebé no atu hahú oinsá.

“Laiha aprovasaun finál kona-ba akordu maibé iha apoiu polítiku totál, hahú hosi Primeiru-Ministru no Konsellu Ministru (KM) tomak ba projetu ne’e atu la’o ba oin, hodi bele kria empregu ba ita-nia rain no projeta konfiansa ba investimentu estranjeiru ne’ebé ita presiza”, tenik Ministru iha Palásiu Governu, kuarta ne’e.

Tuir governante ne’e, Primeiru-Ministru ho membru governu seluk hakarak serbisu maka’as ba viabilizasaun, nune’e bele tulun hamosu duni projetu ne’e hanesan realidade ba rai Timór.

Notísia Relevante: Projetu Pelican Paradise, PM Husu Empreza Labele Hein Komunidade Mamuk

Tuir planu, Pelican Paradise Group, Lda sei halo dezenvolvimentu turístiku ho investimentu hamutuk ho montante miliaun $700.

Área dezenvolvimentu turístiku ne’e tuir planu sei harii iha rai ektare 558, iha zona entre Tasi Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Notísia Relevante: PM Taur Husu Kompañia Pelican Paradise, Bainhira Hahú Projetu?

Dezenvolvimentu ne’e sei permite kriasaun kampu traballu ba ema 1500 iha faze konstrusaun no 1300 kampu traballu permanente hafoin konstrusaun no reflorestasaun projetu atinje ona porsentu 80.

Antes ne’e, iha loron 13 marsu 2019, responsável Pelican Paradise Group, Lda sira halo ona aprezentasaun iha Konsellu-Ministru maibé governu sei estuda kle’an hodi haree, hafoin hakat ba prosesu tuir mai.

Proposta Investimentu Hahú Tinan 2008

Proposta investimentu kompañia internasionál husi Malázia ne’e hahú kedas iha tinan 2008, iha V Governu Konstitusionál, ne’ebé antes ne’e lidera husi Primeiru-Ministru, Kay Rala Xanana Gusmão.

Nune’e, Governu hasai rezolusaun nú. 33/2015, 5 outubru no aprova hodi hahú konstrusaun.

Kontratu Pelican Paradise ho governu iha inisiál ba tinan 50 no posibilidade sei renova ba tinan 50.

Nune’e mós, Pelican Paradise sei sai mother company ba kompañia hamutuk 20 husi nasaun Singapura no Malázia, ne’ebé sei hamutuk halo projetu boot ne’e.

Hetan Ona Sertifikadu Investimentu Husi Governu

Antes ne’e, iha loron 22 janeiru 2018, VII Governu Konstitusionál atribui ona sertifikadu investimentu ba Pelican Paradise hodi halo investimentu turístiku.

Diretór Ezekutivu TradeInvest, Arcanjo da Silva esplika atu hetan sertifikadu investidór, prosesu ne’e naruk tebes tanba presiza hatama proposta investimentu ba TradeInvest, hafoin instituisaun ne’e sei halibur diretór sira hanesan membru Komisaun Avaliasaun ba Investimentu Privadu no Esportasaun (KAIPE), hodi diskute kona-ba proposta ne’e.

Hafoin atribui sertifikadu investimentu, tuir planu konstrusaun ne’e sei hahú iha loron 31 marsu 2018 husi faze hanesan sei harii otél no halo konkursu internasionál.

Sertifikadu ne’e entrega direta husi Xefe Governu VII, Marí Alkatiri ba CEO Pelican Paradise, Datuk Edwar Ong, akompaña husi membru governu balun no emprezáriu nasionál no internasionál, no mós parseiru dezenvolvimentu sira.

Iha aprezentasaun, ekipa husi Pelican Paradise fó atensaun maka’as ba ambiente, nune’e sei kuda ai-horis iha foho lolon no fatin ne’ebé mak ai-horis laiha, nu’udar parte ida husi re-florestasaun, nune’e governu mós apresia inisiativa ne’e.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here