Koordenadór AIFAESA.IP, Abílio Oliveira Sereno hamutuk ho nia ekipa sira halo enkontru ho xefe suku sira iha Dili laran, kuarta (20/11/2019). Imajen/Osória Marques

DILI, 20 novembru 2019 (TATOLI)- Autoridade Inspesaun, Fiskalizasaun Atividade Ekonómika no Sanitária (AIFAESA), ohin, halo enkontru ho xefe suku sira iha Munisípiu Dili nia laran hodi kria koordenasaun no komunikasaun atu oinsá mak parte rua servisu hamutuk halo prevensaun ba sasán no ai-han sira ne’ebé fa’an iha loja, restaurante, kioske no seluk-seluk tan.

Notísia Relevante : AIFAESA Foti Ona Amostra Foos Globus Importadu Hosi Xina

Koordenadór AIFAESA.IP, Abílio Oliveira Sereno, informa,  enkontru ne’e nu’udar meius kooperasaun no komunikasaun ne’ebé AIFAESA halo ho xefe suku sira para bele halo mós prevensaun iha suku laran molok AIFAESA tun ba baze.

Kona-ba fenómena kazu foos ‘plástiku’, Abílio Oliveira Sereno hateten, ida ne’e dezafiu ida tanba AIFAESA la iha laboratóriu atu halo teste ba foos ne’ebé deskonfia plástiku.

“Ita atu halo teste ba foos plástiku maibé ekipamentu ba teste laiha,” Koordenadór AIFAESA informa iha Matadouro, Dili.

Nia dehan, foos plástiku sai preokupasaun ne’e lori ona ba laboratóriu Ministériu Saúde (MS) no Ministériu Agrikultura no Peska (MAP) atu halo teste, maibé la iha ekipamentu.

“Ho ida ne’e haforsa ami-nia planu hodi halo asaun preventiva nune’e hosi planu asaun preventiva mak ohin ami halo enkontru ho Xefe Suku sira atu sira mós koordena ho AIFAESA hodi halo kontrolu iha baze molok AIFAESA tun,” Abílio Sereno hateten.

“Iha tempu badak, ami sei fó rezultadu foos plástiku bainhira kompañia ne’e fó ona sertifikadu no hatete foos ne’e bele konsumu no ami mós informa ona ba Ministériu Públiku atu sira investiga tuir kazu refere.”

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here