Diretór Operasaun Aifaesa Gabriel da Costa,Imajen/Egas Cristovão

DILI, 06 novembru 2019 (TATOLI) – Diretór Operasaun Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA), Gabriel da Costa, informa AIFAESA halo ona intervensaun liuhosi foti amostra (sampel) ba foos Globus ne’ebé importa hosi nasaun Xina tanba konsumidór sira konsidera hahán ne’e kualidade ladi’ak.

“Ami-nia intervensaun foti ona amostra ba foos Globus atu halo teste. Ami seidauk hatene tanba ne’e presiza orsamentu no tempu ba teste ne’e mak ami buka halo koordensaun ho parte hotu-hotu antes atu lori sampel ne’e bá”, Gabriel Costa ba Ajénsia Tatoli iha nia serbisu fatin Matadouru, ohin.

Tanba ne’e atu hatene loloos foos ne’e kualidade ka lae, AIFAESA seidauk bele foti konkluzaun, maibé kuandu rezultadu laboratóriu mak hatudu foos ne’e kualidade ladún di’ak ba konsumidór maka AIFAESA sei foti medida tuir dekretu lei númeru 23/2009, kona-ba sansaun ka multa rihun ida to’o rihun 10.

Maibé molok atu halo teste, AIFAESA halo koordenasaun ho Ministériu Saúde no Agrikultura atu hetan autorizasaun hafoin halo teste ba foos Globus, ho razaun katak ministériu rua ne’e enfrenta ona problema hanesan ne’e iha ai-han batar no lori kedas bá Xina hodi halo teste.

“Horseik ami kontaktu ona nia distribuidór sira, sira dehan katak foos sira ne’e haruka husi Xina”, katak.

Tanba ne’e, AIFAESA sei kontinua la’o hodi halo inspesaun bá loja no supermerkadu sira inklui loja Globus nian.

AIFAESA halo intervensaun ba produtu refere bainhira simu informasaun iha rede sosiál. Entretantu, tuir publikasaun konsumidór balun iha mídia sosiál (facebook) katak foos ho marka Globus ne’e labele konsome tanba deskonfia prodús husi plástiku.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here