Terminál ró iha Portu Dili. Foto/JICA.

DILI,  19  novembru 2019 (TATOLI) – Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, hateten konstrusaun fízika re-alokasaun terminál ró iha Portu Dili atinje ona porsentu 100, nune’e hela de’it prosesu inaugurasaun atu entrega ofisiál ba Governu Timor-Leste iha janeiru 2020.

“Loloos entrega ona iha fulan ne’e (novembru), maibé iha kestaun téknika uitoan tanba presiza halo koordenasaun ho Ministériu Negósiu Estranjeiru no Kooperasaun (MNEK) Timor-Leste no Embaixada Japaun no JICA hodi realiza prosesu inaugurasaun, maibé ita sei hala’o iha loron 16 janeiru 2020”, Prezidente APORTIL ba Tatoli, iha kna’ar fatin Portu Dili, ohin.

Nune’e, Flávio dehan daudaun APORTIL koordena Governu Timor-Leste liuhusi MNEK tanba Embaixada Japaun no Ajénsia Kooperasaun Internasionál Japaun (JICA, sigla inglés) hakarak halo inaugurasaun hamutuk ho edifísiu Politékniku Universidade Nasionál Timor Lorosa’e (UNTL) iha Hera.

“Ita koordena malu atu konvidadu espesiál husi Japaun mai, presiza MNEK atu fasilita prosesu hodi inaugurasaun la’o ho di’ak”, katak.

Governu Timor-Leste tenke prepara prosesu ho di’ak tanba Japaun ajuda ona Timor-Leste, nune’e tenke simu  ho di’ak no presiza halo eventu ida atu hatudu katak  prosesu konstrusaun hotu ona no ofisiálmente sira entrega mai iha Governu Timor-Leste, liuliu mai iha APORTIL atu jere. “Presiza agradesimentu ida”, nia afirma.

Hafoin inaugurasaun ba re alokasaun terminál ró ne’e, bele funsiona ho di’ak atu ró Nakroma no ró seluk bele halo ona operasaun.

Rerminál ró ne’e ho naruk metru 100 ho luan metru 20, ne’ebé bele akomoda ró rua durante oras 24 nia laran, ho andár ida no bele akomoda ema na’in-300.

Konstrusaun ne’e tau fatuk dahuluk iha loron 8 outubru husi Governu Timor-Leste no hetan apoia finanseira husi Governu Japaun ho montante ¥2.197 (maizumenus millaun dólar amerikanu 20) no Governu Timor-Leste mós aloka osan millaun $1.

Projetu re-alokasaun terminál ferry ne’e konstrui hosi Tobishima Corporation no hetan supervizaun husi konsultór joint venture (konsórsiu) Ides Inc. and Japan Port Consultants, Ltd, ho durasaun konstrusaun hahú iha 31 marsu 2019 to’o 31 outubru 2019.

Notísia relevante : Terminál Ró Atinje Ona 98%, Posibilidade Entrega ba Governu iha Novembru Ne’e

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here