Terminál ró iha Portu Dili. Foto/JICA.

DILI, 24 setembru 2019 (TATOLI) – Vogál I Autoridade Portuária Timor-Leste (APORTIL, I.P), José Madeira Marques, informa konstrusaun ba re-alokasaun terminál ró iha Portu Dili atinje ona porsentu 98,48.

“Iha konstrusaun atinje ona porsentu 98,48 ne’ebé posibilidade sei finaliza iha outubru no entrega ba Governu iha novembru tinan ne’e”, Vogál I APORTIL ne’e ba Ajénsia Tatoli, iha knaar fatin, Portu Dili, ohin.

José Madeira dehan konstrusaun terminál ne’e prepara de’it ba ró pasajeiru sira ne’ebé ho padraun internasionál tanba kompleta ho ekipamentu sira hanesan sistema movable ramp ba veíkulu ró rua ne’ebé atraka, beacon ligth, seguransa ba ekipamentu inklui ba inséndiu ruma.

Daudaun, kontraktor Tobishima Corporation sei iha hela faze monta sistema movable ramp no dragon lighting ho modelu hanesan kámara video vijilánsia (CCTV) monitoriza asidente ruma akontese iha tasi-laran.

Bainhira kontraktor entrega ba Governu-Timor Leste liuhusi Ministériu Transporte no Komunikasaun mak sei prepara osan uitoan fali atu hadi’a terminál nia oin atu karreta no motór bele para no halo lutu ba terminál ne’e.

“Ita rasik mak prepara orsamentu atu hadi’a fali parajen transporte nian no halo lutu, orsamentu ne’e sei iha diskusaun laran”, katak.

Iha fatin hanesan, Konsultór Portu ba Planeamentu no Instalasaun husi Japan International Cooperation Agency (JICA), Kenji Sasa, dehan konstrusaun ba terminál ró ne’e iha sentru kapitál ho objetivu atu fasilita movimentasaun abitante ka pasajeiru sira hala’o viajen lokál no internasionál ka turista sira.

“Ita apoia Governu Timor-Leste atubele halo separasaun ba pasajeiru sira no ró ne’ebé tula sasán ka kontentór sira”, katak.

Nia dehan terminál ne’e sei monta sistema movable ramp atu automatikamente tasi sa’e sistema ne’e mós tuir tasi hodi pasajeiru sira labele bokon.

Nia salienta tinan ne’e halo ona estudu ba sistema rede server hodi halo monitorizasaun ba akontesimentu iha tasi-laran.

Projetu realokasaun terminál ne’e ho naruk metru 100 ho luan metru 20, ne’ebé bele akomoda ró rua durante oras 24 laran, ho andár ida no bele akomoda ema na’in-300.

Konstrusaun ne’e tau fatuk dahuluk iha loron 8 outubru husi Governu Timor-Leste no hetan apoia finanseira husi Governu Japaun montante ¥2.197 (maizumenus millaun dólar amerikanu 20) no Governu Timor-Leste mós aloka osan millaun $1.

Projetu re-alokasaun terminál ferry ne’e hetan supervizaun husi konsultór joint venture (konsorsiu) Ides Inc. and Japan Port Consultants, Ltd ho durasaun konstrusaun hahú iha 31 marsu 2019 to’o 31 outubru 2019. 

Notísia relevante : Konstrusaun Terminál Portu Pasajeiru Atinji Ona Pursentu 95

Governu TL-Japaun Lansa Projetu Re-alokasaun Terminál Ró

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here