MRLAP kontinua hala'o konsulta públiku ba lei kustumeiru no justisa tradisionál iha Postu Administrativu Iliomár, tersa (19/11/2019). Imajen/Nelson de Sousa

ILIOMÁR, 19 novembru 2019 (TATOLI)–Ministériu Reforma Lejizlativa no Asuntu Parlamentár (MRLAP), ohin, kontinua hala’o konsultasaun  públiku  kona-ba lei kostumeiru no justisa tradisionál ba komunidade, lia na’in ho autoridade Postu Administrativu Iliomár, Munisípiu Lautem.

Notísia Relevante : MRLAP Halo Konsulta Públiku Lei Kostumeiru iha Viqueque

Programa ne’e hanesan kompromisu polítika oitavu governu nian ba  reforma sektór justisa  hodi fó asesu justisa ba povu ho prósperu tanba ne’e  konsultasaun publika ida ne’e atu bele  tulun MRLAP  rekolla informasaun hosi lia na’in sira kona-ba direitu kostumeiru no prosesu tesi lia iha komunidade nia leet durante bei-ala sira nia tempu to’o mai ohin loron.

Atividade  konsulta publika ne’e hala’o ona ba munisípiu 11 ho dalen sira hanesan Manbae, Tokodede, Kemak, Bunak, Tetum Terik, Isni, Laklei, Galolen, Idate, Kairui,Uaima, Midiki, Makasae, Naueti no ohin ho komunidade Makalero iha Iliomár.

Notísia Relevante : Lia Na’in husu MRLAP Elabora Lei Fó Kbiit ba Sira Rezolve Disputa iha Suku

Koordenadór Programa  no Asesór Sósiu Kultura hosi MRLAP, Josh Trindade hatete, hosi rezultadu konsulta públiku ne’e sei hakerek dokumentu polítika ida hodi sai baze atu hakerek enkuadramentu legál hodi regula ligasaun entre justisa formál no justisa tradisionál.

“Lei kostumeiru ho justisa tradisionál ne’e sei fó vantajen ba autoridade suku hodi rezolve konflitu sira iha suku no aldeia laran, tanba lei ida ne’ebé propoin sei fó kompeténsia forte liu ba autoridade lokál sira,” Josh Trindade esplika iha ámbitu konsulta publika iha salaun administrasaun Iliomár.

Oitavu governu haree katak justisa tradisionál importante hodi justisa ba povu ho prósperu , tanba tuir estudu ne’ebé  iha kazu barak mak  pendente  iha tribunál, kompostu hosi kazu krime 3000-resin no kazu sivíl 1000- resin.

Administradór Postu Administrativu  Iliomar, João Baptista Ruas hato’o bemvindu ba ekipa MRLAP  ne’ebé  bele realiza ona konsultasaun publika ne’e iha Iliomár.

Nia husu ba autoridade lokál ho lia na’in atu kanaliza informasaun no esperiénsia ho loloos kona-ba prosesu tesi lia tradisionais ne’ebé la’o ona.

Notísia Relevante : MRLAP Hala’o Konsultasaun Públika ba Lei Kostumeiru ho Justisa Tradisionál iha Baucau

 Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here