DILI, 19 novembru 2019 (TATOLI)-Ministra Edukasaun, Juventude no Desportu (MEJD), Dulce de Jesus Soares hateten kada inspetór eskolár ida sei toma konta ba eskola 20. Tan ne’e husi total inspetór 90 ne’e tenke serbisu maka´as hodi lori progresu di´ak ba dezenvolvimentu edukasaun iha Timor-Leste (TL).
“Maske kada pesoál asume responsabilidade b’ot hodi tau-matan ba eskola rua. Maibé, ha’u ejize ba ita-bo’ot sira (inspetór) atu badinas servisu nafatin hodi hadia ita-nia sistema eduksaun,” hateten Ministra Dulce de Jesus Soares, iha ámbitu entrega manuál inspesaun ba inspetór no superintende sira, iha Timor Plaza, tersa (19/11/2019)
Ministra Dulce dehan nia komprende tebes situasaun no kondisaun Inspetór no superintendente sira nian barak tamba to’o agora governu liuhusi MEJD seidauk responde ho didi´ak difikuldade ne’ebė inspetór sira hasoru.
“Maibe ha’u lakohi rona tanba de’it kondisaun no situsaun ho obstákulu oioin ita bo’ot sira abandona tiha serbisu. Ne’e labele akontese, nia fó hanoin.
Nia dehan, hanesan membru governu nia komprende tebes difikuldade sira ne’e maibe ho esperansa ne’ebė iha enkoraza nafatin inspetór sira atu nune´´e nafatin iha responsalblidade ba ida ne’e tanba antes ne’e mandatu ba inspetór sira tinan lima de’it maibe agora aumenta liután.
Ho difikuldade ne’ebė iha Ministra kompromete 2020 nia sei loke fali prosesu rekrutamentu ba kna’ar superintendente no inspetór eskolár nian atu nune’e bele iha tan rekursu adekuadu hodi redús responsalblidade kada inspetòr ida iha eskola 20.
Tanba kna’ar superintendente no Inspetòr sira nian atu halo kontrolu ba eskola sira hodi tau-matan ba prosesu ensinu aprendijazen iha kada eskola. “Pelumenus movimentu eskola sira ne’e lao ka lae. Se la lao tanba saida, presiza hetan konfirmsaun,” friza governante ne´e.
Notísia relevante:IGED Apoiu Manuál Inspesaun Eskolár Ba Inspetór Sira
Jornalista :Tomé Amado
Editór : Rafy Belo