Ró Berlin Nakroma. Imajen Espesiál.

DILI, 30 setembru 2019 (TATOLI) – Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hatete APORTIL asina ona kontratu ho kompañia Ben Santoso hodi lori ró Nakroma bá halo manutensaun iha Surabaya-Indonézia.

“Ita asina ona kontratu, ohin, ho Kompañia Ben Santoso husi Indonézia ne’ebé komesa, ohin, ró Nakroma bele arranka ona bá Surabaya halo manutensaun”, Prezidente APORTIL ba Ajénsia Tatoli iha knaar fatin, ohin.

Prezidente ne’e friza, ró Nakroma hala’o manutensaun iha Surabaya-Indonézia durante fulan rua. “Ita fó sira tempu másimu loron 40 hahú husi ita asina kontratu, tanba husi ne’e bá Surabaya kuaze loron lima no fila loron lima entaun ita fó loron 30 atu hala’o manutensaun”, katak.

Flávio Cardoso dehan tékniku APORTIL sira laiha fasilidade ne’ebé natoon atu luku tun bá tasi atu haree ró Nakroma nia okos, ne’ebé kuandu to’o iha ne’ebá mak kompañia haree presiza hala’o  manutensaun ró iha tasi okos, entaun presiza mós orsamentu adisionál ruma.

Nia salienta téknikamente ba manutensaun ró haree nia mákina sira, eletrisidade, sistema navegasaun no materiál salva vida, pinta fali no hasai ferrujen sira iha ró nia okos.

Nune’e ho esperansa, Prezidente APORTIL ne’e dehan fin novembru ou inísiu dezembru Nakroma tenke iha ona Timór tanba presiza fasilita abitante sira bá Oekusi no Ataúru hodi selebra Natál no tinan foun.

Durante Nakroma halo manutensaun, APORTIL hala’o ona koordenasaun ho ró Sukses husi Malázia atubele hala’o viajen bá Oekusi no Ataúru.

“Ha’u koordena ho ró Sukses, durante Nakroma laiha sira bele hala’o operasaun ho di’ak”, katak.

Ró Nakroma halo manutensaun iha Surabaya-Indonézia ho totál orsamentu $226.000.

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Planu diak ba mantensaun
    Hau la konkorda ho jestaun servisu ladiak
    katak tekni iha ro ida troka mk hafoin sai ba halo mantensaun

HAKEREK NO HATÁN

Please enter your comment!
Please enter your name here