Tratór sira maioria avaria hela iha Edifisiu MAP Ainaro. Imajen/Egas Cristovão

AINARO, 19 novembru 2019 (TATOLI) — Iha mandatu Governu da-haat nian, Ministru Agrikultura no Peska (MAP), Mariano Assanami Sabino, fahe tratór liman (hand tractor) ba grupu agrikultura sira iha territóriu ho polítika ida atu mellora  no hasa’e produtu agríkola ba nesesidade nasionál.

Notísia Relevante : Ainaro Poténsia Zona Ortikultura

Alein ne’e, MAP mós distribui trator boot  ba MAP Munisípiu 12, inklui Rejiaun Administrativu Espesiál Oe-Cusse, atu bele apoia fila rai komunidade nian. Nune’e, ba MAP Ainaro nian hetan tratór boot 19 no tratór liman 128.

Diretór Ministériu Agrikultura no Peska (MAP) Munisípiu Ainaro, Lúcio Romeo Ribeiro, hateten, maioria tratór boot  ne’ebé destaka iha MAP Ainaro to’o oras ne’e avaria hela. Nune’e, tratór liman 128 ne’e distribui hotu ona ba grupu agrikultura sira hodi reje rasik, balun sei di’ak no balun at ona ka la funsiona ona.

Nia esplika, tratór boot 19 MAP Ainaro jere dezde Primeiru-Ministru, Rui Maria de Araújo inaugura irrigasaun Raibere. Tratór boot 19 iha modelu haat (4) hanesan Ferguson, MF 5000, Kubota no Agrowindo.

Hosi tratór liman 128 ne’e grupu agrikultór sira mak responsabiliza, manutensaun sira mak halo, maibé karik aat bolu tékniku MAP ba hadi’a no ekipamentu agrikultór sira mak sosa.

“Tratór boot ne’e hitu (7) mak sei funsiona, restu avaria, tratór boot Agrowindo haat (4) tama iha leilaun, maibé ema lakohi leilaun no atu halo manutensaun orsamentu la sufisiente,” informa Lúcio Romeo Ribeiro ba Agência TATOLI iha Edifísiu MAP Ainaro, segunda  (18/11/2019).

Nia hatutan, orsamentu manutensaun ba tratór boot rihun $8, maibé prosesu tenderizasaun MAP Nasionál mak halo.

Tratór ki’ik no tratór boot hirak ne’e distribui ba Munisípiu Ainaro dezde 2011, maibé iha 2010 ba kotuk ne’e Ainaro iha tratór boot ho modelu Ferguson hamutuk haat (4).

“Maibé tratór Ferguson nia sasán ne’e karun, ida de’it $65mill depois nia suku cadang laiha,” hateten Diretór MAP Munisípiu Ainaro.

Nia dehan, iha grupu agrikultór balun fa’an tiha tratór liman ne’ebé sira simu ba komunidade Zumalai, maibé Diretór ne’e orienta no halo kooperasaun ho polísia ba foti fali.

“Balun monta fali dinamo, monta fali nia mákina ba mákina mabel nian, ha’u kolabora ho polísia haruka sobu no foti,” nia afirma tan.

Tuir kolonializasaun hahú hosi jullu tratór boot ne’e fila-rai iha Maubisse no atu hotu ka la hotu tenke sai tanba kombustivel ne’ebé hetan litru 5000 de’it.

“Ita tenke halo hanesan ne’e para balansu, nune’e agrikultór iha Ainaro bele hetan hotu fila-rai,” informa Diretór MAP Munisípiu, Lúcio Romeo.

Jornalista : Evaristo Soares Martins

Editór        : Francisco Simões

HAKEREK NO HATÁN

Please enter your comment!
Please enter your name here