Merkadu Munisípiu Ainaro. Imajen/Egas Cristovao

AINARO, 19 novembru 2019 (TATOLI) — Diretór Ministériu Agrikultura no Peska (MAP) Munisípiu Ainaro, Lúcio Romeo Ribeiro, hateten, Munisípiu Ainaro poténsia zona ortikultura, maibé envolvimentu agrikultór sei menus.

Diretór MAP Munisípiu Ainaro, Lucio R. Ribeiro. Imajen/Egas Cristovao

“Ainaro poténsia ba ortikultura. Ne’e ita klasifika ona hosi Maubisse mai Hatu-Builico ho Postu Ainaro sorin, hanesan ai-fuan (frutas), depois kafé, baunila, só ké dezafiu ida maka ami hasoru, ita-nia agrikultór ne’e agora la produtivu. Ita nia joven sira lakohi ona tama to’os hodi kotniua avo ho inan-aman sira nia liman fatin nu’udar to’os na’in,” hateten Lúcio Romeo Ribeiro, ohin, iha Edifísiu MAP Ainaro.

Husi MAP Ainaro nia parte halo ona tentativa oioin atu konvense joven sira envolve fila ba to’os no natar, inklui halibur sira iha projetu Hasa’e Produtividade Agrikultura Sustentável (HAPAS), maibé la konsege tanba joven sira la fó importánsia. Tanba ne’e susar atu Hasa’e Produtividade Agrikultura Sustentável (HAPAS), ne’e mak dezafiu boot liu.

Nia salienta, to’o agora laiha setór privadu maka investe iha setór agrikultura iha Munisípiu Ainaro, maibé  emprezáriu Timor-oan, Rui Manuel Castro mak hakiak manu frangu iha Cassa.

Diretór ne’e preokupa ho emprezáriu nasionál no lokál sira halai liu ba projetu infraestrutura, maibé la investe iha setór produtivu sira hanesan agrikultura no turizmu.

“Ortikultura iha tempu Indonézia nian fehuk-ropa boot loos, agora ita buka fali fehuk-ropa ida ne’e laiha ona,” nia fó sasin.

Diretór MAP Ainaro ne’e husu ba joven sira sai agrikultór, nune’e númeru agrikultór bele aumenta hodi bele atinje programa ne’ebé trasa ona iha Planu Estratéjiku Dezenvolvimentu Nasionál (PEDN) 2011-2030.

Jornalista : Evaristo Soares Martins

Editór       : Francisco Simões

HAKEREK NO HATÁN

Please enter your comment!
Please enter your name here