Ministru Ensiñu Superiór, Siénsia no Kultura, Longuinhos dos Santos. Imajen Tatoli/Egas Cristóvão

DILI, 19 Novembru 2019 (TATOLI)—Ministru Ensinu Superiór Siénsia no Kultura, Longuinhos dos Santos, hateten agora daudaun Governu halo instrusaun ba péritu ne’ebé maka atu halo estudu viabilidade no dezeña detalla enjiñaria nian  hafoin maka ita harii Sidade Universitária iha Aileu tuir kronograma ne’ebé maka iha.

“Konstrusaun Sidade Universitáriu Aileu ne’e, agora iha faze indeminizasaun. Agora, ita mós halo instrusaun ba péritu ne’ebé maka atu halo estudu viabilidade no dezeña detalla enjiñaria nian  hafoin maka ita harii Sidade Universitáriu Aileu tuir kronograma ne’ebé maka iha,” dehan Longuinhos dos Santos ba jornalista sira iha Salaun Ian Martin, Balide, Dili, tersa (19/11/2019).

Tanba seidauk iha estudu viabilidade no halo dezeñu enjinária detalladu, governante ne’e  hatutan, entaun orsamentu ne’ebé aloka atu ba harii konstrusaun refere seidauk hatene loloos ninia montante tanba seidauk preve.

Nia haktuir, relasiona ho planu prioridade Oitavu Governu Konstitusinál nian atu harii Sidade Universitáriu mak daudaun ne’e Governu tenta halo aprosimasaun nafatin ho komunidade sira iha Suku Lawesi no Mandudatu, Munisípiu Aileu.

“Sidade Universitáriu Aileu sai hanesan prioridade programa ida ba Oitavu Governu Konstitusionál nian tanba ne’e Governu halo aprosima ba komunidade tomak iha suku Lawesi no Mandudatu iha uma kain 39, entre uma kain 46 maka aseita para atu harii Sidade Universitáriu Aileu,” nia informa.

Ministru Longuinsho hatutan, Ggovernu sei kontinua halo nafatin aprosimasaun tanba direitu atu respeitu rai ba sira no atu dignifika sira. Tanba, nia dehan, atu halo Sidade Univesitáriu iha Aileu ne’e nu’udar interese nasionál nian ne’ebé laiha ema ida maka atu la aseita tanba ninia vantajen ne’e sei fó liu ba Munisípiu Aileu no Aileu oan sira.

“Projetu ida ne’e hanesan prémiu ida oferese ba Aileu oan sira. Tanba, ida ne’e hanesan ramu husi Universidade Nasionál Timor Lorosa’e (UNTL) nian atu oferese ba sira,” Governante ne’e esplika.

Notísia relevante:Novembru, Desizaun Finál ba Konkursu Estudu Sidade Universitária Aileu

Jornalista: Nelia Borges

Editór: Rafy Belo

HAKEREK NO HATÁN

Please enter your comment!
Please enter your name here