Diretór Nasionál Aprovizionamentu MOP, Quintiliano Afonso Belo. Imajen/ Tatoli Florencio Miranda Ximenes.

DILI, 25 outubru 2019 (TATOLI) – Diretór Nasionál Aprovizionamentu, Ministériu Obra Públika (MOP), Quintiliano Afonso Belo, hateten kompañia hamutuk 40-resin ne’ebé tuir konkursu, iha de’it empreza na’in-11 mak liu ona no halo ona aprezentasaun planu estudu viabilidade no detailed engineering design (DED) ba Sidade Universitária Aileu.

Empreza 11 ne’ebé liu ona faze dahuluk iha aprezentasaun estudu viabilidade no DED hanesan kompañia TPF Timor Unip, Lda, Aurem Solis, Uma de Construção, Bernabad Arquitectura SLP, Renrah Brathers, BKMJV Uma Waque, Sun Rice Golden, Aresco Consultant Unip, Lda, Bita Enarco, Venio 93 Consulting Unip, Lda  Jv Cv Hastongkara no Kiat Unip, Lda JV Patron Arsindo.

“Ami sei halo avaliasaun ba kompañia 11 ne’ebé liu ona faze aprezentasaun, iha novembru nia laran ami fó sai ona empreza the best one no the best two”, Diretór Quintiliano Afonso Belo, ba Ajénsia Tatoli iha knaar fatin Kaikoli, ohin.

Quintiliano Belo friza iha desizaun ba empreza the best one no the best two, sei konvida fali empreza sira hodi loke finansiál, atu fasilita MOP foti desizaun ba kompañia ida sai vensedór hodi hahú hala’o estudu planu mestre no DED.

“Ami sei deside ho profisionál atu kompañia ne’ebé manán konkursu (tender) bele hala’o estudu viabilidade no dezeñu ho kualidade ho padraun internasionál hodi ajuda Governu atu hala’o konstrusaun ba Sidade Universitária Aileu iha 2020”, katak.

Loloos iha ona desizaun iha outubru nia laran, maibé tamba iha problema uitoan iha terrenu, ekipa téknika dada uitoan hodi hein desizaun nivel polítika hodi ultrapasa tiha problema ne’ebé ekipa hasoru iha terrenu.

MOP prevee orsamentu ba estudu viabilidade no DED Sidade Universitária Aileu hamutuk rihun U$550.

Iha termu referénsia(ToR) nia laran dehan kompañia tenke iha kapasidade atu halo estudu viabilidade ba impaktu jeotékniku, ambientál, sósiu-ekonómiku, liuliu analiza atu loke universidade iha Aileu durante fulan tolu ou fulan neen nia laran.

Iha mandatu Oitavu Governu Konstitusionál mak loke konkursu públiku ba kompañia sira atu hala’o estudu viabilidade, no Governu prevee ona osan ba konstrusaun iha Fundu Infrastrutura ba 2020.

Notísia relevante : Estudu Viabilidade ba Sidade Universitária Aileu Hahú iha Outubru

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here