Segundu Komandante Polisia Munisípiu Dili, Superintendente Asistente Polisia, Euclides Belo. Imajen/Eugénio Pereira

DILI, 18 novembru 2019 (TATOLI)-Polisia Nasionál Timor-Leste Munisípiu Dili  hahú inísiu fulan novembru to’o agora  rejista  ona kazu insidente no  asidente tráfiku  ba transporte motor no karreta hamutuk 42 hodi rezulta ema na’in rua mate.

Notísia Relevante : Komjer PNTL Hakarak Movimentu Dili Laran To’o Oras 24

“Semana ne’e ita rejista kazu asidente no insidente 42 no ema na’in rua maka mate,” informa Segundu Komandante PNTL Munisípiu Dili, Superintendente Asistente Polisia, Euclides Belo, ohin,  ba jornalista iha Caicoli, Dili.

Nia esplika, kazu asidente ne’e mosu tanba karreta soke malu, motor ho motor  soke malu no karreta soke motor.

Kazu asidente tráfiku  rezulta António de Jesus hela iha Suku Bairo-Pité mate fatin bainhira kondús motor mega-pro ho xapa matríkula E-9303 hodi soke motor ida iha Ponte Comoro III iha sábadu (16/11/2019).

 “Vítima ho motór ho velosidade ultrapasa karreta maka kait malu ho motór ida monu maka karreta trek ida sama, depois hein ambulánsia ba kleur too vítima hakotu iis,” nia tenik.

PNTL rejista mós  kazu asidente tráfiku  ne’ebé akontese iha  sesta (15/11) dadeer iha   área Metinaro, Dili, hodi rezulta vítima,  Pedro Onio Conceição  mate fatin.

Atu prevene asidente tráfiku iha estrada públiku kapitál nasaun nian, PNTL sei hala’o kontrolu másimu ba movimentu transporte públiku  durante oras 24 kada loron.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here