Prezidente Autoridade RAEOA-ZEEMS, José Luís Guterres ‘Lugu’. Imajen Tatoli/António Gonçalves

DILI, 15 novembru (TATOLI) – Prezidente Autoridade Região Administrativa Especial Oe-Cusse Ambeno (RAEOA) no Zona Ekonomia Espesiál Sosiál no Merkadu (ZEESM), José Luis Guterres ‘Lugu’, hateten sente triste bainhira simu dadus kona-ba ró Haksolok.

Prezidente Autoridade RAEOA-ZEEMS deklara sentimentu triste ne’e bainhira vizita bá Ministru Estadu Prezidénsia Konsellu Ministru, Hermenegildo Augusto Cabral Pereira relasiona ho prosesu ró Haksolok.

“Ha’u mós ko’alia ho Ministru Estadu Prezidénsia Konsellu Ministru, Hermenegildo Augusto Cabral Pereira, ba kestaun ró Haksolok, tanba iha dadus presiza hatene no komprende nune’e toma desizaun ruma karik, desizaun ida ne’ebé ho loos para labele penaliza fali orsamentu ne’ebé  ita iha  ita-nia rain, katak ita labele hakarak salva millaun $15 ita tau tan osan ba, envés ita hetan ró más ita bele lakon fali millaun $30 ou 40, tanba desizaun balu persiza iha korajen para toma”, Lugu hatete hafoin vizita bá Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, iha eskritóriu MKAE, Palácio Governo, ohin.

Eis Primeiru-Ministru ne’e hatutan : “Ami sei halo buat hothotu, halo konsulta no haree opsaun barak para haree opsaun sira ne’ebé di’ak liu ba ita-nia Estadu. Ha’u hetan dadus kona-ba ró Haksolok, kestaun dadus profundamentu triste ba ita-nia rai, tanba ha’u lakohi ko’alia demais tanba buat sira ne’e ita presiza ko’alia ho advogadu, ko’alia ho instituisaun seluk para estuda didi’ak hodi bele rezolve problema ne’e”.

Bainhira husu kona-ba esperansa katak ró Haksolok ne’e sei mai Timor-Leste, Lugu hatán : “Ha’u hanoin difísil”.

Notísia relevante : PM Delega Ministru Hermenegildo Akompaña Kazu Ró Haksolok

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here