Ró Haksolok. Imajen dok. ZEESM

DILI, 29 outubru 2019 (TATOLI) – Primeiru-Ministru (PM), Taur Matan Ruak, delega Ministru Estadu Prezidénsia Konsellu Ministru, Hermenegildo Augusto Cabral Pereira, reprezenta Governu akompaña prosesu kazu Ró Haksolok ne’ebé sai ona polémika iha públiku nia leet.

Ró Haksolok ho kustu millaun €13,7, inaugura iha loron 26 maiu 2017 iha sidade Figueira da Foz, Portugal no tuir informasaun sei to’o Timor-Leste iha outubru 2017, maibé tanba problema internál husi kompañia Atlantic Eagle Ship Building ho sub-kontratórvmaka to’o agora ró seidauk mai. Ró ne’e rasik iha kapasidade atu tula ema na’in-377 no karreta hamutuk 15.

Notísia Relevante: Prezidente RAEOA Konsidera Seidauk Iha Kontratu Adisionál Millaun $14 Ba Ró Haksolok

Ministru Hermenegildo, hateten kona-ba kestaun ne’e, nia parte hasoru ona Eis Prezidente Autoridade Rejiaun Espesiál Oé-cusse Ambeno no Zona Ekonomia Espesiál Sosiál Merkadu (RAEOA-ZEESM), Marí Alkatiri, tanba momentu ne’ebá Autoridade rejiaun ne’e maka halo kontaktu direta ho kompañia ne’ebé toma konta ba ró-ahí.

“Haree hela oinsá atu muda naran ró-ahí ba ZEESM maibé seidauk kompletu. Maski armadór mak ZEESM, Governu Sentrál ho instrusaun Primeiru-Ministru nian entrega mai ha’u atu koordena didi’ak hodi akompaña prosesu, tanba ne’e maka ha’u ho Doutór Marí hasoru malu ona no ami sei mantein kontaktu hodi tau matan ba prosesu ida-ne’e hodi la’o didi’ak”, tenik iha audiénsia konjunta Komisaun no Governu iha sala plenáriu Parlamentu Nasionál (PN), tersa ne’e.

Governante ne’e, ko’alia asuntu Ró Haksolok tanba Prezidente Komisaun C (Trata Asuntu Finansa Públika), Deputada Fernanda Lay, husu esplikasaun kona-ba prosesu kontratu ba ró-ahí ne’e.

“Insolvénsia Atlántiku (bankarota) ne’e perigu tebes, tanba ne’e ha’u husu Señor Ministru halo esplikasaun ba asuntu ne’e”, tenik Deputada Bankada CNRT ne’e.

Hatan ba kestaun ne’e, Ministru Hermenegildo rekoñese Insolvénsia Atlántiku asuntu sériu tebes.

“Ein termu jurídiku, ita ko’alia jestaun kontratu la’ós ko’alia ró-ahí tanba ró ne’e seidauk muda ba RAEOA nia naran maka kontratu ne’e seidauk konklui maibé perigu Insolvénsia Atlantiku ne’e boot duni”, nia akresenta.

Notísia Relevante: Kazu Ró Haksolok, Semana Ne’e Tribunál Deside Kapasidade Finanseiru Kompañia

Ministru Hermenegildo hasoru malu ho Eis Prezidente Autoridade iha kinta semana kotuk, hodi haree oinsá maka ZEESM nu’udar armadór ninia kontratu ho kompañia inklui perigu Insolvénsia Atlantiku.

“Insolvénsia tuir rejime jurídiku Portugal ninian, dahuluk asionista tenke selu maka Estadu tanba impostu. Maibé Doutór Marí dehan katak ho intervensaun RAEOA-ZEESM ninian, Timor-Leste nia RAEOA-ZEESM maka parte daruak”, nia informa.

Entretantu, prosesu kontrusaun Ró Haksolok ninia kontratu asina iha 2014 entre Governu no empreza portugués. Konstrusaun ró ne’e konsege paradu maibé bainhira estabelese ZEESM, prosesu kontrusaun ró-ahí ne’e entrega ba Autoridade mak responsabiliza.

Entretantu, Ferry Ró Haksolok, desizaun atu hili ninia estaleiru (fatin atu harii ró) hahú no foti husi V Governo Konstitusionál ne’ebé lidera Kay Rala Xanana Gusmão nu’udar Primeiru-Ministru, tuir ninia reprezentasaun husi Ministru Transporte no Komunikasaun, Pedro Lay da Silva, ne’ebé selebra kontratu ho estaleiro Atlantic Eagle Ship Building Lda. (Atlanticeagle) iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu Timor-Leste ba Autoridade RAEOA-ZEESM hodi transfere poder no alokasaun verba ne’ebé akontese liu tiha akordu entre Governu no Estaleiru Atlantic Eagle no liu estaleiru hodi hahú harii ró.

Hodi garante implementasaun tuir espesifikasaun no padraun tékniku ba Ferry Ró Haksolok no assegura katak ró ne’e bele hetan rejistu internasional (Registo Internacional de Navios da Madeira em Portugal) tuir rekezitu Governu Timor-Leste, RAEOA-ZEESM selebra kontratu supervizaun ba konstrusaun ferry ho Instituto de Soldadura e Qualidade (ISQ), ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here